Sýretti túsirgen Erlan OMAR, «Egemen Qazaqstan»
Jıynda sóz sóılegen G.Ábdiqalyqova jastar saıasaty «Qazaqstan-2050» Strategııasynyń negizgi maqsatynyń biri ekenin atap ótti. Onyń aıtýynsha, qazirgi tańda elimizde júıeli ózgerister júrip jatyr.
«Memleket basshysy «Bizdiń jastarymyz oqýǵa, jańa ǵylym men bilimdi ıgerýge, jańa mashyqtar alýǵa, bilim men tehnologııany kúndelikti ómirde sheber de tıimdi paıdalanýǵa tıis. Biz bul úshin barlyq múmkindikterdi jasap, eń qolaıly jaǵdaılarmen qamtamasyz etýimiz kerek», dep atap ótken bolatyn. Elimizde ekonomıkanyń jańa modelin qalyptastyrýǵa, saıası reformalaýǵa jáne qoǵamdyq sanany jańǵyrtýǵa baǵyttalǵan eldiń Úshinshi jańǵyrýy júzege asyrylyp jatyr. Osy asa mańyzdy úderiste ult bolashaǵy – jastarǵa erekshe kóńil bólinip otyr», dedi G.Ábdiqalyqova.
Otyrysta jastardy, sonyń ishinde aýyl jastaryn jumyspen qamtý jáne ornalastyrý boıynsha memlekettik sharalar týraly Din isteri jáne azamattyq qoǵam, Eńbek jáne halyqty áleýmettik qorǵaý, Ulttyq ekonomıka, Bilim jáne ǵylym mınıstrleriniń baıandamalary tyńdaldy.
Is-sharada keltirilgen aqparatqa súıensek, búginde elimizde 2,12 mıllıon belsendi jas bar. Sonyń 2 mıllıonǵa jýyǵy jumyspen qamtylǵan. Iаǵnı, jastar arasyndaǵy jumyssyzdyq deńgeıi 4 paıyzdy qurap otyr.
Jumyspen qamtý jáne jappaı kásipkerlikti damytý baǵdarlamasynyń iske asyrylýy nátıjesinde tehnıkalyq jáne kásiptik bilim alýǵa 21 myń jas joldanǵan. Al 30 myńnan astam óskeleń urpaq qysqa merzimdi kásiptik bilim aldy. Baǵdarlama aıasynda 1,1 myń adamǵa shaǵyn nesıe berildi. Jalpy, osy jobanyń oryndalýy barysynda 163,6 myń jas jumyspen qamtyldy.
Keńes músheleri Jastar saıasaty jónindegi keńestiń 2018 jylǵa arnalǵan jumys josparyn maquldady. Otyrys qorytyndysy boıynsha Memlekettik hatshy jastardy jumyspen qamtý jáne áleýmettik qoldaý máseleleri boıynsha birqatar tapsyrma berdi.
Abaı ASANKELDIULY,
«Egemen Qazaqstan»
