Oınaı almaıtyn legıonerler kimge kerek?

Matveı Matveev

(«Oqjetpes», 2 oıyn)

«Oqjetpes» komandasy maýsym­nyń ekinshi jartysynda jańa oıynshylar ala bastady. Qorǵanysty kúsheıtý maqsatynda Reseıden Mat­veı Matveev degen fýtbolshy shaqyrtyldy. Iá, «Oqjetpes» bi­rinshi aınalymda óz qaqpasyna kóp gol jiberdi. Alaıda reseılik legıoner nege ekeni belgisiz, maýsym aıaqtalǵansha 2 matchta ǵana alańǵa shyqty. Saýal: sonda mundaı legıonerdi komandaǵa aldyrtýdyń maqsaty ne?

Aleksandr Ermachenko

(«Aq­tóbe», 5 oıyn)

Jańa maýsym bastalǵan sátte «Aq­tó­be» komandasy 8 legıonerdi bir-aq aldy. Olardyń ishinde Aleksandr Ermachenkonyń aty erekshe ataldy. Ýkraınanyń birneshe klýbynda dop tepken fýtbolshy «Aqtóbeni» alǵa súıreıdi dep topshylaǵandar da az bolǵan joq. Klýb basshylary osylaı jar salyp, komanda kúsheıip jatyr degenge toqtaldy. Alaıda osy fýtbolshy chempıonattyń alǵashqy aınalymynan keıin óz
ota­ny­na qaıta oraldy. Qazaqstan fýtboly ýkraınalyqty jatsyndy ma, álde aıaqdopshynyń ózi bizdiń eldi jersinbedi me, áıteýir bergen qarajatty aldy da taıyp tur­dy. Osyndaı legıonerlerdiń sany «Aqtó­bede» jetkilikti. Birinshi aınalymnan keıin komandadan Vıtor Jýnıor (6 oıyn), Chako Torres (7 oıyn), Papa Gýıe (9 oıyn), Dıas Kasıano (12 oıyn) sekil­di fýtbolshylar alastatyldy. Bul, árıne komandaǵa jańa fýtbolshylar irikteý barysyndaǵy qatelikti kórsetedi. Komandanyń fýtbolshylar suryptaý jónindegi salǵyrttyǵy kózge anyq uryp tur.

Výkashın Tomıch

(«Atyraý», 3 oıyn)

«Atyraý» komandasy da jıi bapker aýystyryp, berekesi qashyp júretin ujymnyń biri. Bapker aýysqan saıyn komandadan fýtbolshylar da kete bas­taıdy. Ár bapker komandaǵa kelgende ózimen birge birneshe fýtbolshy ala keletin ádeti bar emes pe? Sol sekildi Zoran Výlıch komandaǵa bapker bolyp taǵaıyndalysymen jańa legıonerlerdi tartty. Olardyń qatarynda kezinde «Taraz» sapynda oınaı almaı, Qazaqstan chempıonatynan kóńili qalǵan Výkashın Tomıch bar edi. Serbııalyq legıoner alǵashqy aınalymda 3 oıyn ótkizip, Výlıch qyzmetinen bosaǵannan keıin
otanyna oraldy. Horvatııalyq bapker sondaı-aq óz otandasy Ivan Rodıchti de ala kelgen bolatyn. Bul oıynshy da 5 match ótkizip, alǵan qarjysyn tolyqtaı aqtap kete almady.

Amer Bekıch

(«Tobyl», 4 oıyn)

Jazǵy transfer ashylǵan kezde «Tobyl» birneshe fýtbolshy alyp, komandany kúsheıtpekshi boldy. Alaıda bul maqsattary júzege aspady. Alǵan legıonerleri negizgi quramǵa iline almaı, qosalqy quramda otyrdy. Mysaly, bosnııalyq shabýylshy Amer Bekıch nebári 4 oıynǵa ǵana qatysyp, qarsylas komandanyń qaqpasyna gol soqpaǵan. 4 aıda 4 oıynǵa qatysyp qomaqty jalaqy alǵan Amer jol tússe Qazaqstanǵa taǵy da kelýdi josparlaıtyny anyq. Al osyndaı shabýylshyny qostanaıdyń «Tobyly» qandaı maqsatpen komandaǵa alǵany taǵy belgisiz.

Zoran Rendýlıch

(«Ordabasy», 4 oıyn)

Shymkenttiń «Ordabasy» komandasy jergilikti jastarǵa kóbirek senim artady. Birinshilik bastalar tusta Tańat Nóserbaev, Azat Nurǵalıev sekildi jer­gilik­ti oıynshylaryn da óz sapyna jınady. Odan bólek legıo­nerlerge de senim artty. Solardyń biri bosnııalyq qorǵaýshy – Zoran Rendýlıch. Qazaqstan birinshiliginde 4 oıyn ótkizgen Zoran zoryqty ma, Shymkenttiń ystyq kúnine shydamady ma, áıteýir ujymǵa alǵashqy aınalymnan keıin kerek bolmaı qaldy. Mundaı qatelikti Baqtııar Baıseıitovtiń komandasy endi qaıtalamasa eken deımiz-daǵy.

«Qaırat» pen «Astana» sekildi júldege talasyp júrgen komandalarda mundaı jaǵdaı joqtyń qasy. Qos ujymdaǵy legıonerler artylǵan senimdi aqtap, oıynnyń negizgi tirekterine aınalady. Oınaǵan oıyndary men kórsetken nátıje­leri de kóńilden shyǵady. Al joǵaryda atalǵan klýbtardyń bap­ker­leri men basshylary osyndaı legıo­ner­lerdi jyl saıyn jınap alyp, keli­sim aıaqtalmaı jatyp elderine qaıta­rady. Jyl saıynǵy bul ádettiń de ózindik júıesi bar sekildi kórinedi. Keıbir oıynshylardyń transferi men jalaqysyna bólingen qarjy jelge ushqanyn estigende jaǵańyzdy ustaısyz. Fýtboldaǵy jemqorlyqtyń da bir sheti osy tusta kórinip qalatyndaı. Syrttan kelgen fýtbolshylar jergilikti jas­tardan bir bas joǵary turady, sondyqtan da olar qazaqstandyq fýtbolshylarǵa qaraǵanda, kóbirek jalaqy alady dep túsindiretin klýb basshylary osy maqalaǵa qalaı jaýap qaıtarar eken?

Ermuhamed MÁÝLEN,

«Egemen Qazaqstan»