Sondyqtan bolar Abaı atyndaǵy Opera jáne balet teatrynda ótken konsertke qarashańyraqtan túlep ushqan óner maıtalmandary men ustazdar túgel jınaldy. Mereıtoıyn atap ótip otyrǵan bul oqý ornynda Evgenıı Brýsılovskıı men Latıf Hamıdıler sabaq berse, Shabal Beısekova, Ermek Serkebaev, Sydyq Muhametjanov, Baqytjan Baıqadamov, Álibek Dinishev, Ǵazıza Jubanova, Quddys Qojamııarov, Nurǵısa Tilendıev, Keńes Dúısekeev, Naǵıma Esqalıeva sekildi esimi elge tanymal óner tarlandary tálim alyp shyqqan. Búginde kolledj atalyp otyrǵan elimizdiń eń baıyrǵy mýzykalyq oqý ordasynan segiz KSRO halyq ártisiniń, 60-tan artyq Qazaqstannyń halyq ártisi men eńbek sińirgen qaıratkerlerdiń qanattanyp ushqanyn árbir shákirt maqtanyshpen aıtady. 85 jyl ishinde oqý ornyn 9000-nan astam túlek bitirgen.
Ǵasyrǵa qaraı qadam jasap kele jatqan kolledj bul merekesine úlken daıyndyqpen keldi. Dúnıejúzilik klassıkalyq mýzykanyń asa iri ókili sanalatyn P.Chaıkovskıı atyndaǵy oqý ornynyń shyǵarmashylyq ujymynyń Máskeý qalasynda jeke konsert berip qaıtýy – oqý orny úshin jyldyń eń mańyzdy oqıǵasy boldy. Kolledjdiń aýlasyna esimin ıelenip otyrǵan uly kompozıtordyń eskertkishi ornatyldy. Sondaı-aq P.Chaıkovskıı atyndaǵy kolledj kóptegen mýzykalyq baıqaýlar men báıgelerdiń uıymdastyrýshysy retinde de belgili. Tek bıylǵy jyly ǵana qazaq óneriniń kórnekti ókilderi Káýken Kenjetaev pen Shabal Beısekova atyndaǵy halyqaralyq konkýrs, «Kóshpendiler áýeni» atty jas oryndaýshylardyń respýblıkalyq baıqaýy, «Jas talant», «Almaty International Piano Festival» sekildi mýzykalyq orta úshin mańyzy joǵary bes birdeı báıge ótkizildi.
Kolledj dırektory, Qazaqstannyń eńbek sińirgen qaıratkeri Birjan Hasanǵalıev: «85 jyldyq tarıhy bar Qazaqstandaǵy tuńǵysh mýzykalyq oqý ornynyń ulttyq ónerge qosyp kele jatqan úlesi zor. Bıik belesterdi baǵyndyryp, qazaq óneriniń maqtanyshyna aınalǵan qadirli tulǵalarymyzdyń kópshiligi osy shańyraqqa qaryzdar dep oılaımyn. Olardyń jolyn qýyp, izin basyp, ókshelep kele jatqan jas ónerpazdarymyz erteńgi kúni aǵa-apalary shyqqan bıikten kórinetini sózsiz», deıdi.
Táýelsizdik merekesi qarsańynda týǵan kúnin atap ótip otyrǵan kolledjdiń birqatar bilikti ustazdaryna Mádenıet jáne sport mınıstrliginiń marapaty men Almaty qalasy ákiminiń Alǵys hattary tabystaldy. Mýzyka merekesi ispetti uıymdastyrylǵan mereıtoılyq konsertte kolledjde bilim alyp jatqan daryndy shákirtter men olardy baýlyp otyrǵan oqytýshylar, sondaı-aq sımfonııalyq jáne ulttyq orkestr ujymy óner kórsetti.
Aıgúl AHANBAIQYZY,
«Egemen Qazaqstan»
ALMATY
