Memleketter basshylarynyń resmı kezdesý rásiminen soń shaǵyn quramdaǵy kelissózder júrgizildi.
Nursultan Nazarbaev Qazaqstanǵa resmı saparmen kelýge shaqyrýyn qabyl alǵany úshin Sooronbaı Jeenbekovke rızashylyq bildirip, Qyrǵyz Respýblıkasy Prezıdentiniń alǵashqy sapary eki el arasynda ornyqqan dıplomatııalyq qarym-qatynastyń 25 jyldyǵymen tuspa-tus kelip otyrǵanyn atap ótti.
Memleket basshysy Qazaqstan men Qyrǵyzstan qarym-qatynastarynyń tarıhı turǵydan dostyq sıpaty bar ekenin aıtty.
– Qazaqstan men Qyrǵyzstan – baýyrlas ári odaqtas memleketter. Bizdiń aramyzdaǵy barlyq salada syndarly jáne senimdi dıalog ornaǵan, – dedi Qazaqstan Prezıdenti.
Sooronbaı Jeenbekov Nursultan Nazarbaevqa Qazaqstanǵa resmı saparmen kelýge múmkindik týǵyzǵany úshin jáne ótken saılaýdaǵy jeńisimen quttyqtaǵany úshin alǵys aıtty.
– Meniń Qazaqstanǵa birinshi saparym qos mereıtoı – elderimiz arasyndaǵy dıplomatııalyq qarym-qatynastardyń 25 jyldyǵy men Máńgilik dostyq týraly shartqa qol qoıylýynyń 20 jyldyǵy qarsańynda ótýde. Bizdiń tarıhymyz da, tilimiz de, dinimiz ben mádenıetimiz de bir, – dedi Qyrǵyzstan Prezıdenti.
Memleketter basshylary kezdesý sońynda búgingi kelissózder men olardyń qorytyndysy boıynsha qol qoıylǵan qujattar ekijaqty qarym-qatynastardy odan ári nyǵaıtýǵa septigin tıgizetinine senim bildirdi.
