28 jeltoqsan kúni Syrdarııa ózeninde seń qozǵalyp, sý deńgeıi kóterildi. О́zenniń eski arnasy tolyp, PMK-29 saıajaıynyń ishki kanalyna kóp mólsherdegi sýdyń túsýinen 9 turǵyn jaıdyń aýlasyna sý jaıylǵan.
«Saıajaı massıvinde barlyǵy 76 úı bar, onyń ishinde 37-si jyl boıy paıdalanylatyn úı. Qazirgi kezde sý tasqynynyń aldyn alý sharalary aıasynda turǵyndary qaýipsiz aımaqqa kóshirildi. Sondaı-aq, uzyndyǵy 100 m jýyq arnanyń qorǵaý dambalaryn bekitý úshin 8 tehnıka men 15 adam jumyldyrylyp, 22 jaýapty uıymnyń táýlik boıy kezekshiligi bekitildi», - dep málimdedi Serik Sermaǵambetov.
Atap óteıik, PMK-29 saıajaıy ózen arnasyndaǵy sý deńgeıi joǵarylaǵan kezde ońaı sý jaıylatyn aımaq bolǵandyqtan turǵyndarǵa aldyn ala eskertpe hattar taratylǵan. Degenmen, 28 jeltoqsan kúni 22.50-de Qyzylorda qalasy mańyndaǵy Prýdhoz eldi mekenindegi Kentaı jaıylymynyń sý basqan aýmaǵynda 2 adam masań kúıde qarańǵyda adasyp, muz astyna túsken. Bireýi qaıtys boldy, ekinshisi qutqaryldy.
Jalpy oblys aımaǵyndaǵy jaǵalaý boıynda qorǵaý dambalarynyń 96 qaýipti ýchaskesin belgilep, jóndeý jáne qalpyna keltirý jumystary júrgizildi. Odan bólek, Syrdarııa jaǵalaýy 56 sý basý qaýpi bar aımaqqa bólinip, quramynda 459 arnaıy tehnıka jáne 1957 adam bar 172 jaýapty mekeme bekitildi.Sý tasqyny kezeńinde turǵyndardy evakýasııalaý úshin 83 jınaqtalǵan evakýasııalyq jáne 104 qabyldaý beketi daıyndaldy. Sondaı-aq, oblys boıynsha 148 tonna janar-jaǵarmaı, 284200 dana qap, 10400 qamys, 3800 pashyn, 3600 dana qarabýra jáne ózge de qajetti materıaldar men quraldar ázirlendi.
Basqarma málimetinshe, búgingi jaǵdaı boıynsha Qyzylorda oblysynda ózennen túsken sý kólemi 640 m3/sek. quraıdy. Qyzylorda sý torabyna túsken sý kólemi 530 m3/sek. Soltústik aýdandarda aýa temperatýrasynyń tómendeýine baılanysty Syrdarııa ózeninde muz qatty, al óńtýstik aýdandarda muz bolmady.
«Qazirgi tańda aımaqta jaǵdaı qalypty jáne turaqty baqylaý júrgizilip jatyr», - dedi S.Sermaǵambetov.
