Jańa jyl ıek astyna kelip, qarbalas kóbeıse de jańa úı turǵyndarynyń qýanyshyn bólisýge Batys Qazaqstan oblysynyń ákimi Altaı Kólginov arnaıy keldi.
– О́ńirimizde memlekettik «Nurly jol» jəne «Nurly jer» baǵdarlamasy aıasynda kóp jumys atqaryldy. Sonyń ishinde oblysta 115 myń sharshy metr turǵyn úı salyndy. Barlyq qarjy kózderin qossaq, bir jyl ishinde jalpy 380 myń sharshy metr turǵyn úı paıdalanýǵa berilgen eken. Munyń barlyǵy halyq ıgiligi úshin atqarylyp jatqan jumys. Qonystaryńyz qutty bolsyn! Jańa jyl tek búgingideı shattyq, qýanysh əkele bersin, – dedi óńir basshysy.
2017 jyly oblysta 14 kóp qabatty, 188 bir qabatty turǵyn úı salynyp, 1500 otbasy baspanaly boldy. Sonyń ishinde «Nurly jer» baǵdarlamasy aıasynda 985 páterden turatyn 7 úı salynǵan. Memlekettik baǵdarlamanyń «Jergilikti atqarýshy organdar jelisi boıynsha kredıttik turǵyn úı» baǵyty boıynsha 481 páterli 4 úı, «Báıterek Development» AQ jelisi boıynsha 504 páterli 3 úı boı kóterdi. Turǵyn úı qurylys jınaq banki oblystyq fılıalynyń dırektory Aıgúl Naýryzálıevanyń aıtýynsha, bank qyzmeti óńirde óte tanymal. Turǵyn úı qurylys jınaq bankinen salym ashqan aımaq turǵyndarynyń sany 55 myńǵa taıaǵan. Banktiń 18 722 klıenti kelisimshartty 2017 jyly resimdegen.
2018 jyly bank «Nurly jer» baǵdarlamasyn júzege asyrýdy jalǵastyrady. «Qurylysty jeke qurylys júrgizýshiler arqyly yntalandyrý» baǵdarlamasy aıasynda oblysta 173 turǵyn qonys toıyn toılamaq. «Qazaqstannyń Turǵyn úı qurylys jınaq banki» AQ men «Qaz-Hol» JShS jáne «Karavannyı pýt» JShS arasynda qol qoıylǵan kelisimderge sáıkes, Oral qalasyndaǵy Qurmanǵazy kóshesi, 198 mekenjaıynda 9 qabatty turǵyn úıdiń jáne Gagarın kóshesi, 2 mekenjaıy boıynsha 126 páterli úıdiń qurylysy júrýde. Úıler 2018 jyldyń tamyzynda paıdalanýǵa beriledi dep josparlanyp otyr. Bul – apatty turǵyn úılerdiń ornyna kóterilip jatqan jańa ǵımarattar.
Qurylys tek Oral qalasynda júrip jatqan joq. «Nurly jer» baǵdarlamasy aıasynda «Jeke turǵyn úı qurylysyn damytý» baǵytynda Toqpaı, Fedorovka, Peremetnoe jáne Darııan eldi mekenderinde jer úıler salynady. Bul eldi mekender oblys ortalyǵyna jaqyn ornalasqan.
Turǵyn úı qurylys jınaq bankiniń jeke ónimi – «О́z úıim» baǵdarlamasy da aımaqta sátti júrip jatyr. Atalǵan joba aıasynda 2018 jyly BQO IID qyzmetkerleri baspanaly bolady. Sonymen qatar Oraldyń soltústik-shyǵys bóliginde «Batys Qazaqstan elektr taratý jelisi kompanııasy» AQ pen «Jaıyqjylýqýat» AQ qyzmetkerleri úshin 9 qabatty turǵyn úı salý josparlanýda. Bul uıymdarda isteıtin qyzmetkerlerdiń jalpy sany 800-den asady. Olardyń kópshiligi baspanaly bolamyn dep aqsha jınap jatqan bank salymshylary.
Qazbek QUTTYMURATULY,
«Egemen Qazaqstan»
ORAL
