Premer-Mınıstr óz sózinde bilim uıymdarynan, jergilikti atqarýshy organdardan, statıstıkalyq baqylaýdan alynatyn málimetterdiń barlyǵy engiziletin bilimniń biryńǵaı aqparattyq júıesi jumys istep turǵanyn eske saldy.
«QR BǴM buǵan deıin aqparattyq júıe - Ulttyq bilim málimetter bazasyn qurdy. Atalmysh aqparattyq júıe turaqty túrde jańartylyp otyrady. 2018 jyldyń sońyna deıin atalǵan aqparattyq júıeni túrlendirý aıasynda 0-18 jastaǵy balalardyń esep júıesin engizý josparlanyp otyr. Osy júıe arqyly balalardyń bilim salasyndaǵy, áleýmettik kómek jáne ózge de qajettilikteri qamtamasyz etiledi», - delingen depýtattyq saýaldyń jaýabynda. Úkimet basshysy Ádilet, BǴM, Eńbek jáne áleýmettik qorǵaý mınıstrlikteriniń arasyndaǵy balalardy tirkeý boıynsha aqparattyq júıe úshin 0-18 jastaǵy balalar týraly málimet aı saıyn ózara almastyrylyp turatynyn habarlaıdy.
«Osyǵan baılanysty balalardy tirkeýdiń biryńǵaı aqparattyq bazasyn QR BǴM Ulttyq bilim málimetter bazasyn jetildirý joly boıynsha qurylady», - deıdi ol. Eske sala ketsek, budan buryn Zaǵıpa Balıeva Májilis otyrysynda joǵaryda atalǵan usynysty bildirgen bolatyn.
«Bizdiń elimizde 5,5 mıllıon bala bar. Búgingi kúni memlekettiń balalardyń barlyq jaǵdaıyn jasaýǵa múmkindigi bar. Osy máselelerdi sheshý úshin menińshe, Qazaqstanda balalardy tirkeýdiń biryńǵaı bazasy qurý jumysy óte mańyzdy dep oılaımyn. Ony Ulttyq bazaǵa engizip, osy bazaǵa jaýap beretin memlekettik organ qurylýy kerek», - degen edi Zaǵıpa Balıeva.
