– Elbasynyń salıqaly saıasatynyń arqasynda elimizdiń densaýlyq saqtaý salasy júıeli túrde damýda, Qazaqstannyń túkpir-túkpirinde ozyq tehnologııalarmen jabdyqtalǵan medısınalyq mekemeler ashylýda. Búgin, mine 150 oryndyq aýrýhana ashyldy. Budan bólek, bıyl osy aýrýhana janynan 250 oryndyq emhana salýdy kózdep otyrmyz. Qazir emhana qurylysyn salý boıynsha qujattar ázirlenýde,– dedi ol.
Aımaq basshysy aýrýhana ujymynyń jumysyna sáttilik tilep, jańa «jedel járdem» kóliginiń kiltin tabystady. Sondaı-aq aýrýhana úshin quny 400 mıllıon teńge turatyn angıograf medısınalyq qondyrǵysy memleket-jekemenshik áriptestigi aıasynda alynýda. Bul qondyrǵy jedel jáne sapaly ota jasaýǵa septigin tıgizip, Qazaly, Qarmaqshy, Aral aýdandary men Baıqońyr qalasynyń turǵyndaryna qyzmet kórsetetin bolady.
Aýdandyq aýrýhananyń ashylýyna qatysqan Parlament Májilisiniń depýtattary Baqtyqoja Izmuhambetov, Abaı Tasbolatov, Muhtar Erman jáne Gennadıı Shıpovskıh pen aýdandyq densaýlyq saqtaý salasynyń ardageri Oraq Keýbasov qazalylyqtardy qýanyshtarymen quttyqtady.
Sondaı-aq oblys ákimi aýdandyq sottyń jańa ǵımaratynyń ashylýyna qatysty. Ǵımarat ishinde sýdıa men hatshylardyń keńseleri, sot májilisi zaldary men muraǵat, keńse jáne qyzmettik bólmeler ornalasqan.
Sonymen qatar Qyrymbek Eleýuly Áıteke bı kenti men Qazaly qalasynyń 2018 jylǵy damý jospary máseleleri boıynsha jıyn ótkizip, jergilikti qoǵamdastyq ókilderimen kezdesip, aýdan jáne oblystyń ózekti máselelerin talqylady.
Aıta keteıik, sońǵy 5 jylda Qyzylorda oblysynda 57 medısınalyq nysan, onyń ishinde Aral, Qazaly jáne Shıeli aýdandaryndaǵy ortalyq aýrýhanalar ashyldy. 2018 jyldyń qańtar aıynan bastap Baıqońyr qalasynda 15 myń qazaqstandyq azamatqa qyzmet kórsetetin emhana jumysyn bastady. Budan bólek, aldaǵy 3 jylda taǵy da 100 densaýlyq saqtaý nysany salynbaq. Sondaı-aq 2015 jyly medısınalyq nysandardyń jabdyqtalý kórsetkishi 43 paıyz bolsa, 2017 jyly 76,5 paıyzdy qurady, al aǵymdaǵy jyly 90 paıyzǵa jetedi degen jospar bar.
Erjan BAITILES,
«Egemen Qazaqstan»
Qyzylorda oblysy
