Qazaqstan ulttyq quramasy 1995 jyldan bastap Devıs kýbogyna turaqty qatysyp keledi. 2011 jyldan beri ǵana álemdik topqa kóterildi. Oǵan deıin irikteýden ári asa almaı júrdi. Sol 2011 jyldan beri quramamyz 41 kezdesýde jeńiske jetip, 28-inde jeńilis tapty. О́tken jyly otandastarymyz álemdik toptyń pleı-off satysyna shyǵyp, Argentına quramasyna qarsylas atandy. Jerebe bul oıyndy Qazaqstannyń alańynda ótedi dep belgilegen soń, jerlesterimiz jelpinip jeńisti julyp áketti. О́z alańyndaǵy oıyndarda kóp jeńile bermeıtin tennısshilerimiz bul joly da Shveısarııanyń apshysyn qýyratyny anyq.
Shveısarııa quramasy Devıs kýbogynda ózine kerekti júldeniń bárin alǵan. 2014 jyly bul qurama chempıon atanǵan da bolatyn. Biraq, sodan beri shveısarııalyqtar sál de bolsa álsirep qaldy. Onyń basty sebebi, komandanyń aınymas lıderi bolǵan Rodjer Federer ulttyq qurama oıyndaryna jaraqatyna baılanysty qatyspaıtyndyǵynda edi. Tipti odan keıingi Stanıslav Vavrınka da quramaǵa kelýin azaıtyp júr. Álemdik tennıs juldyzdaryna kommersııalyq kóptegen týrnırleri demalýǵa mursha bermeı jatady. Keıde osal quramalarǵa qarsy oıyndarǵa kelmeı qoıatyny bar. Sonyń saldarynan bolsa kerek, pleı-off kezeńinde Shveısarııa quramasy Belarýs ujymyn ázer jeńdi. Teketires barysynda 2 jeńiske qolǵabys etken Marko Kıýdınellı kezdesý qaharmanyna aınaldy. Odan bólek Shveısarııa quramasy jas talant Henrı Laksonnendi óz sapyna qosyp alǵan. Sondyqtan da qarsylastyń qarymdy ekenin, ońaı shaǵylar jańǵaq emes ekendigin anyq sezemiz.
Shveısarııa chempıon bolǵan 2014 jyly Qazaqstan quramasy Jenevada shırek fınaldyq kezdesýdi bolashaq chempıondarǵa qarsy ótkizdi. Mıhaıl Kýkýshkın men Andreı Golýbev bastaǵan tennısshilerimiz qansha tyrysqanymen, Federer men Vavrınka sekildi ańyzdarǵa shamalary jetpedi. Jartylaı fınalǵa Shveısarııa ótti. Endi qarymta qaıtaratyn kez kelgen sııaqty.
Osy oraıda biz Qazaqstan quramasynyń kapıtany Dıas Dosqaraevqa habarlasyp, Shveısarııa komandasy jaıly azdy-kem aqpar suradyq.
– Shveısarııa quramasynan ótken joly jeńilip qaldyq. Biraq, alǵashqy kúni olardy utyp bastaǵanymyz esterińizde shyǵar. Bul joly Rodjer Federer kelmeıtin sekildi. Ol Devıs kýbogyn jeńgennen keıin ulttyq quramada oınamaımyn dedi. Jeke týrnırleriniń ózi bastan asyp jatyr. Sondyqtan da Federer osy matchqa qatyspaıtyn shyǵar dep otyrmyn. Al eger Vavrınka keletin bolsa onyń da oıyn tájirbıesi nashar ekendigi belgili. Sebebi, jarty jyl boıy jaraqattan emdelip, kortqa shyqqan joq. Laksonnen degen tennısshileri áli jas. Sondyqtan da óz jerimizde Shveısarııany jeńip ketýimiz ábden múmkin. Eger jeńsek tarıhymyzda tuńǵysh ret jartylaı fınalǵa shyǵamyz. Osyǵan deıin qanshama múmkindigimiz bolyp, sol mejege jete almaı qaldyq. Bálkim, osy joly baǵymyz janar.
Jergilikti jankúıerdiń qoldaýyn sezinse, qazaqstandyq tennısshiler almaıtyn qamal joq. Qarsylastyń ataǵynan úrketin de kezder artta qalǵan. Ultyq quramamyz elorda tórinde Italııa, Argentına, Belgııa sekildi alpaýyt tennıs derjavalaryn tizerletkeli beri barlyǵymen teń dárejede aıqasady. Bul joly qalaı bolaryn baıqap kórelik. Eger jeńiske jetse Qazaqstan quramasy óz tarıhynda tuńǵysh ret jartylaı fınalǵa joldama almaq.
Ermuhamed MÁÝLEN,
«Egemen Qazaqstan»
