Tótenshe jaǵdaılar jónindegi departament mamandary onyń sebebine adamdardyń óz ómirine degen nemquraıdylyǵyn kóldeneń tartady.
Kelispeske shara joq. Kún raıynyń kúrt sýytatyny jaıly saqtandyrýlarǵa qulaq aspaǵandardyń biri – Ýálıhanov aýdany Bereke aýylynyń 20 jastaǵy turǵyny. Mektepte muǵalim bolyp eńbek etetin ol aqtútek borannyń basylýyn kútpesten syrtqa shyqqan. Kósheniń shetinde turatyn joldasynyń úıine soǵyp, odan ári qaıda ketkeni belgisiz. Marqumnyń máıiti eldi mekennen 10 shaqyrym jerden tabylǵan. Mine, sınoptıkterdiń eskertýlerin júre tyńdaýdyń aqyry osyndaı tosyn jaıtqa soqtyrǵan.
Sol sııaqty eki áıeldiń úsik shalyp, kóz jumǵany da salǵyrttyqtyń saldarynan bolǵany anyq. Jambyl aýdany Svıatodýhovka aýylynyń 44 jastaǵy turǵynynyń denesi kósheden tabylǵan. Máıit túni boıy dalada jatyp qalsa kerek. Al Taıynsha aýdany Letovochnoe aýylynyń 65 jastaǵy turǵynynyń óli denesin izdeýshi top aýyl syrtynan keziktirgen.
Jeke úıde turatyn adamdar da saqtyq sharalaryn múldem umytqan tárizdi. Oblys ortalyǵynda úsh jer úı órtenip, tórt adamnyń ómiri qıyldy. Olardyń arasynda 90 jastaǵy keıýana men eki jastaǵy shóberesi bar. Áke-sheshesi ulyn ájeıge tabystap, az ǵana ýaqytqa úıden shyǵyp ketken. Osy eki arada baspana qyzyl jalynǵa oranǵan. О́rt sóndirýshiler jetkenshe ábden tozyǵy jetken aǵash úıdiń tóbesi opyrylyp túsken. О́rt gaz ballonynan tutanǵan degen joramal bar.
Taǵy bir úıde tósekte shylym shekken kúıi qalyń uıqyǵa ketken 66 jastaǵy er adam tútinge tunshyǵyp ólgen. Jer úıdiń peshinen shyqqan taǵy bir «tilsiz jaý» 72 jastaǵy zeınetkerdiń ómirin jalmaǵan. Kózi kórmeıtin múgedek jan syrtqy esikti tappaı qalǵan.
«Saqtansań, saqtaıdy» dep bekerge aıtylmasa kerek. Qaýipsizdik sharalary muqııat oılastyrylsa, mundaı qaıǵyly oqıǵalar oryn almas edi.
О́mir ESQALI,
«Egemen Qazaqstan»
Soltústik Qazaqstan oblysy
