Páter kiltteri tapsyrylǵan saltanatty jıynda oblys basshysy Janseıit Túımebaev memlekettik «Nurly jol» baǵdarlamasy aıasynda elge berilip jatqan turǵyn úıler Elbasynyń halyqqa degen qamqorlyǵynyń kórinisi ekendigin atap ótti.
– Memleket basshysy Nursultan Nazarbaevtyń júrgizip otyrǵan saıasatynyń maqsaty – árbir qazaqstandyq otbasyn jeke turǵyn úımen qamtamasyz etý. Elimizde sońǵy jyldary júzege asyrylyp jatqan «Nurly jol» memlekettik baǵdarlamasy aıasynda oblys ortalyǵyn aıtpaǵanda, óńirdiń túkpir-túkpirinde turǵyn úıler qarqyndy boı kóterip, jerlesterimiz jańa páterlerge ıe bolýda. Mine búgin memlekettik baǵdarlama boıynsha 288 páter óz ıesin tapty. Bıylǵy jyl búgingi páter ıeleri úshin qýanyshty sátten bastalǵaly otyr. Sizderdi qonystaryńyzben quttyqtaımyn, shańyraqtaryńyz baqyt pen qýanyshqa, bala kúlkisine tolsyn, – dedi oblys basshysy.
Páter alǵandardyń biri Baýyrjan Aısaǵalıevtyń qýanyshyn túsinýge bolady. Bilim salasynda 22 jyl qyzmet atqarǵan ustaz:
– Bul kúnge de jettik, – dep marqaıady. – Páter taýqymetin tartqandar onyń qanshalyqty qıyndyǵyn biledi. Búginde Úkimetke artyq-aýys sóz aıtyp, halyqtyń kóńilin qobaljytatyndar kóbeıip barady. El paıdasy úshin eshteńe jasalmaı otyrǵandaı kóredi. О́z basym dál Qazaqstandaǵydaı elge qamqorlyqty kórshiles memleketterden baıqaı qoımaımyn. Halyqtyń álsiz toptaryna jetkilikti kóńil bóliný-
de. Sondyqtan memleket qamqorlyǵy úshin Elbasymyzǵa rahmet aıtamyz.
Jańadan paıdalanýǵa berilgen páter kiltterin tapsyrǵan oblys ákimi Aısaǵalıevtar otbasynyń dastarqanynan dám tatty.
Sóz reti kelgende aıta keteıik, oblysta 2017 jyly aýmaǵy 625,789 myń sharshy metrdi quraıtyn jalpy sany 7500-ge jýyq páter berilgen. Onyń ishinde 3 myńnan astam páter «Báıterek» AQ arqyly berilgen arendaly turǵyn úıler bolsa, 2285 páter jekemenshik esebinen alynǵan turǵyn úıler. Budan ózge, jas otbasylarǵa arnalǵan jáne satyp alý quqyǵynsyz beriletin arendalyq, sondaı-aq nesıelik turǵyn úıler boıynsha 2161 páter ıelerin tapty.
Memlekettik baǵdarlamalar ulystyń uıytqysy atanǵan Ońtústikke osyndaı sharapatyn tıgizip jatyr.
Baqtııar TAIJAN,
«Egemen Qazaqstan»
Ońtústik Qazaqstan oblysy
