Keshe oblystyń 12 aýdany men О́skemen, Semeı, Kýrchatov qalalarynda qatty aıazǵa baılanysty oqýshylar sabaqtan bosatyldy. 22 qańtar kúni О́skemen, Semeı, Rıdder qalalary men Glýbokoe, Aıagóz aýdandarda birinshi aýysymda oqıtyn 1-9, Kókpekti, Abaı jáne Katonqaraǵaı aýdandarynda 1-4-synyp oqýshylary mektepke barǵan joq. Al aýa temperatýrasy -35 gradýsqa deıin tómendegen Zyrıan, Shemonaıha, Borodýlıha, Jarma, Besqaraǵaı aýdandary men Kýrchatov qalasyndaǵy bilim oshaqtarynda birinshi aýysymdaǵy 1-11-synyptardyń oqýshylary men kolledjdiń 1-2 kýrs stýdentteri josparsyz demalýǵa májbúr boldy.
Búgin de О́skemen, Semeı, Rıdder, Kýrchatov qalalary men aımaqtyń 15 aýdanynyń mektepteriniń 1-11 synyp oqýshylary men kolledjdiń 1-2 stýdentteri sabaqqa bara almady. Synap baǵanasy qazir óńirde – 27 (Zaısan aýdany) men – 45-tiń (Besqaraǵaı aýdany) aralyǵyn kórsetip tur. Negizinen tún balasynda kárine minetin sarshunaq aıaz ásirese Borodýlıha (- 42), Shemonaıha (- 40), Glýbokoe, Jarma (-38), Zyrıan, Tarbaǵataı (- 37), Ulan, Abaı, Aıagóz (-36) aýdandary men Semeı (-39), Rıdder, Kýrchatov (-38) qalalarynda bet qaratpaı tur.
Azamat QASYM,
«Egemen Qazaqstan»
