«Qazaqstan Elshiligi men Syrtqy ister mınıstrligi bizdiń azamattarǵa kómek kórsetý tetikterin, onyń ishinde memlekettik bıýdjetten qarjy bólý máselesin iske qosty. Degenmen, ol úshin belgili bir prosedýralar, sáıkesinshe qujattardy jınaý qajet. Bul ispen dıplomattarymyz aınalysyp jatyr. Buǵan qosa, qaza bolǵan azamattyń múrdesin Qazaqstanǵa jetkizý boıynsha kómek kórsetýdiń basqa da joldaryn qarastyrý ústindemiz», - dedi Ánýar Jaınaqov.
QR SIM ókiliniń aıtýynsha jerleý joralǵylaryn kórsetetin aýǵanstandyq kompanııalardyń biri bul qyzmeti 20 myń dollarǵa baǵalap otyr.
«Biraq, dıplomattarymyz jaǵdaıdy túsinip, 6-7 myń dollar soma usynǵan ózge kompanııany tapty. Taıaý kúnderi másele túbegeıli sheshiledi. Biz qaza bolǵan azamattyń týǵan-týystarymen únemi baılanystamyz», - dedi ol.
Aıta keteıik, 21 qańtar kúni Kabýldaǵy Intercontinental qonaqúıine sodyrlar shabýyl jasady. Saldarynan 1978 jyly týǵan Qazaqstan azamaty qaza tapty. Ol Astana qalasynyń turǵyny bolǵan. Aýǵanstanǵa telekommýnıkasııa salasynda jumys atqaratyn aýǵan kompanııalarynyń biriniń shaqyrýymen issaparmen barǵan.
