Premer Marıo Montı bastaǵan Italııa mınıstrler kabıneti zań shyǵarýshylardyń sheshýshi qoldaýyna ıe boldy.
Beısenbi kúni jańa tehnokrattyq úkimetke parlamenttiń joǵarǵy palatasy – Senat senim kórsetse, juma kúni tómengi palata ol úshin óz daýystaryn bermek. Senatta sóz sóılegen Marıo Montı óziniń daǵdarysqa qarsy reformalar baǵdarlamasyn jarııalaı otyryp, eýronyń bolashaǵynyń osy baǵdarlama tabystylyǵyna baılanysty bolatynyn eskertti. Italııa zańnamalaryna sáıkes Marıo Montı kabınetin bekitý tómengi palata depýtattarynyń daýys berýimen aıaqtalady.
Eki aılyq ereýilmen atap ótildi
«Ýoll-strıtti basyp alaıyq» qarsylyq aksııasynyń eki aılyǵyna oraı ondaǵan myń adam Nıý-Iork kóshelerine shyqty.
AQSh-tyń ekonomıkalyq saıasatyna qarsy belsendiler qozǵalysynyń kúres júrgizip jatqanyna dál eki aı tolyp otyr. Mıtıngiler, marshtar men ereýilder barysynda Nıý-Iorkte 300 adam, Los-Andjeleste – 72, Chıkagoda 40 adam ustalǵan. Nıý-Iorkte belsendiler polısııaǵa qarsy bos shólmekter men basqa da qoqystar laqtyryp, olarǵa buryshty gaz shashqan. 10 ereýilshi men 7 polıseı zardap shekti degen málimet bar.
Aq úıdi atqan adam tutqyndaldy
AQSh-ta Aıdaho shtatynyń 21 jasar turǵyny Oskar Ortega-Ernandeske sot AQSh prezıdenti Barak Obamany óltirmek boldy degen aıyp taqty.
Aıyptaý nusqasy boıynsha O.Ortega-Ernandes 2011 jyldyń 11 qarashasynda Aq úıge qaraı eki ret oq atqan. Nátıjesinde bir oq brondy áınekke tıse, ekinshisi qabyrǵaǵa tıgen. Ol ýaqytta B.Obamanyń ózi de, onyń zaıyby Mıshel de Aq úıde bolmaǵan kórinedi. Atylǵan oqtan eshkim zardap shekken joq.
Sırııaǵa qarsy jańa sheshim
Arab memleketteri Lıgasyna kiretin elderdiń Rabatta ótken syrtqy ister mınıstrleri májilisinde Sırııaǵa qarsy jańa sheshim qabyldandy.
Is júzinde Sırııa basshylyǵyna 3 kún merzim ishinde óz aýmaǵyna quqyq qorǵaýshylar ǵana emes, sonymen birge, áskerıler usynǵan 500 baqylaýshyny da jiberý týraly ýltımatým qoıylyp otyr. Olar «Asad rejiminiń qarapaıym azamattarǵa qarsy kúsh kórsetýdi toqtatýyna» baqylaý jasaýy tıis. Munyń ózi Sırııa egemendigine ashyq túrde qysym jasaý bolyp tabylady. Sondyqtan Damaskiniń oǵan kelise qoıýy kúmándi.
Papany jarnamalaýǵa tyıym salyndy
Vatıkannyń qysymymen ıtalııalyq kıim shyǵarýshy Benetton kompanııasy Papa Benedıkt HVI men Egıpettiń Ál-Azhar meshiti ımamynyń súıisip turǵan sýretin jarnamada paıdalanýdy toqtatty.
О́tken sársenbi kúni Vatıkan dinge senýshilerdiń sezimderin qorlaıtyn fotomontajdy jarnamalyq naýqan úshin paıdalanýǵa qarsylyq bildirgen bolatyn. Pontıfıktiń ókili kardınal Federıko Lombardı sýretti Papa qasıetin óreskel qorlaýshylyq jáne qarapaıym ádeptilik erejelerin burmalaýshylyq dep baǵalady. Italııanyń katolıktik qoǵamdastyǵy ókilderi de narazylyq bildirip otyr. Ázirge musylman álemi daýly jarnamaǵa qatysty tis jarǵan joq. Arab álemi ıtalııalyq katolıkterge qaraǵanda tózimdirek bolyp shyqty.
Grýzııa Reseı tilegin qanaǵattandyrdy
Grýzııa prezıdenti Mıhaıl Saakashvılı Reseıdiń Búkilálemdik saýda uıymyna ótýine baılanysty Grýzııa men Reseı úkimetteri arasyndaǵy kelisimdi bekitti.
9 qarasha kúni Reseı men Grýzııa Jenevada Shveısarııanyń araaǵaıyndyǵymen Reseıdiń BSU-ǵa ótýine eń sońǵy kedergini joıatyn úkimetaralyq kelisimder paketine qol qoıǵan bolatyn. Olardyń biri Abhazııa men Ońtústik Osetııa aýmaqtary boıynsha taýar aınalymyna halyqaralyq monıtorıng júrgizýge qatysty. Ekinshi máselege sáıkes monıtorıng júrgizetin kompanııa beıtarap jaq – Shveısarııaǵa esep beretin bolady.
Tonnelden tabylǵan marıhýana
Polısııa Amerıkanyń Kalıfornııa shtaty men Meksıkanyń Tómengi Kalıfornııa shtatyn jalǵaıtyn iri tonneldi anyqtaǵan.
Onda kem degende 15 tonna bolatyn marıhýana tabylǵan kórinedi. AQSh-tyń kóshi-qon jáne keden polısııasy ókiliniń aıtýynsha, 370 metrlik tonnel Amerıkanyń San-Dıego qalasy mańyndaǵy qoımany Meksıkanyń Tıhýana qalasyndaǵy qoımamen jalǵastyrǵan. Tonnel jeldetkish júıesimen jáne jaryqpen jaraqtandyrylǵan kórinedi.
Prezıdent saılaýy ótpeıtin boldy
Moldovada osyǵan deıin josparlanǵan el prezıdenti saılaýy ótpeıtin boldy.
Oǵan parlament depýtattarynyń memleket basshysy kandıdatýrasyn belgileýde ózara kelise almaýy sebepker bolyp otyr. Ázirge múmkin degen kandıdattardyń bir de biri saılaný úshin qajetti daýys jınaı almaǵan. Osylaısha memleket basshysyn saılaıtyn kún jańadan taǵaıyndalmaq. Moldovanyń prezıdentsiz ómir súrip jatqanyna 11 qyrkúıekte 2 jyl toldy. Bul álemdik rekord bolyp sanalady.
Shopıng úshin úzdik qala atandy
Kıev Eýropadaǵy shopıng-týrızmniń eń úzdik qalalary reıtıngine endi.
Zertteý júrgizilgen 33 tanymal qalalardyń ishinde Kıev 26-shy oryn alǵan. Ol tipti Varshava men Sankt-Peterbýrg sııaqty qalalardy da artta qaldyrǵan. Tek 19-shy oryn alǵan Máskeý ǵana Kıevten ozyp tur. Kıev dúkenderiniń uzaq jumys isteýi jáne jeńildikterdiń kóp bolýy arqyly osyndaı nátıjege jetken.
Internet materıaldary negizinde ázirlendi.
