«SPORT» gazeti. Keshe, búgin jáne erteń

Qazaq eliniń Táýelsizdigine 20 jyl tolyp otyrǵan tolaıym kúnderi ár istiń, ár salanyń tarıhynyń eske oralatyny zańdy qubylys. Sondaı umytylmas isterdiń biri – Qazaqstan sport baspasóziniń tuńǵyshy – respýblıkalyq «Sport» gazetiniń dúnıege kelýi. Aldaǵy esik qaǵyp turǵan 2012 jyldyń 1 qańtarynda bul oqıǵaǵa týra 53 jyl tolady. Osy jarty ǵasyrdan asqan ýaqyt aıasynda qazaq sporttyq baspasózi úlken ózgeristerge ushyrady. Elimizde sporttyq baspasózder qatary ósti, olar alýan túrde óz oqyrman, tyńdarman, kórermenderine jetip te jatyr. Biraq sol búkil istiń altyn bastaýy bolǵan tuńǵysh sporttyq baspasózimiz – «Sport» gazetiniń jóni basqa. Ras, aradaǵy 53 jylda «Sport» gazeti de kóptegen sapalyq, maz­mundyq ózgeristerge ushyrady: gazettiń kólemi ósti, aty, quryl­taı­shylary ózgerdi... biraq gazettiń jan-júregi, ómir-ózegi bolar oqyr­many, sizder ózgergen joqsyzdar! Gazetter nebir qıyn kezeńdi basynan ótkizdi. Táýelsizdik alǵan jyldardyń basynda qıyn ekonomıkalyq jaǵdaıǵa oraı gazetterdiń jyldap shyqpaı qalǵan da kezderi boldy. Odan bergi aralyqta da gazetimiz qamqorlyqsyz qalyp, sizdermen ýaqytsha qaýyshpaǵan sátteri boldy. Biraq, bir jaqsysy, bári artta qaldy. Ásirese, qazaq tilindegi «Sport aıdyny» atalǵan gazetimizdiń 2010 jyldyń basynan 2011 jyldyń ekinshi jartysyna deıin shyqpaı qalýy elim, ultym degen sezimi bar árbir basshy azamatqa syn bolǵanyn jasyrmaı aıtamyz. Sport gazeti jańasha boı túzep, Almatydan Astanaǵa kóship, attaryn ózgertip, endi qaıta toqtamastaı bolyp shyǵyp jatyr, qadirli oqyrman. Gazetimizdiń qazaq tilindegi ataýyn da sport qoıyp, tek ony latyn qaripterimen órnektedik, ıaǵnı aty – «Sport». Maqsatymyz sol baıaǵy ulttyq sezimge baılaýdy – qazaq oqyrmanyna, qazaq balasyna el, álem sporty qupııalaryn jetkizip, jetkinshek urpaqtyń qııalyn oıatý, tárbıe berip, sport álemine shaqyrý. Gazetimizde ultymyzdyń sańlaq sportshylary, álem sportynyń juldyzdary jaıly qyzyqty maqalalar jarııalanbaq, nebir qyzyqty uıymdastyrý sharalary bolmaq. Mysaly, kelesi jyly gazet uzaq jyl júrgizip kelgen «Bir atanyń balalary fýtbol oınaıdy» atty otbasylyq shaǵyn fýtbol týrnırleri óz jalǵasyn tappaq, gazet atynan ózge de jarystar ótkizilmek. Biz óz nazarymyzdy ásirese qazaq ulty kóbirek shoǵyrlanǵan aýyldyq jerlerge burmaqpyz. Sondyqtan da sizderdiń shańyraqtaryńyzda kelesi jyl boıy «Sport» gazeti jatsa degen arman bar bizde. Ol úshin sizder «Sport» gazetin respýblıkalyq katalogtyń 59-shy betinen taýyp alyp bir jylǵa jazylýlaryńyz kerek. Katologtyń betine deıin aıtyp, táptishtep jatqanymyz – gazet 2 jyldaı shyqpaı qaldy, sondyqtan respýblıkalyq katalogten túsip qaldy, sizder de ol jiptiń ushyn tappaı qalasyzdar ma degen alańdaý. Bizdiń respýblıkalyq katalogtegi ındeksimiz 64190 jáne 14190 (ujymdar úshin). Nesip JÚNISBAEV, «Sport» gazetiniń bas redaktory, Qazaqstan Respýblıkasynyń eńbek sińirgen qaıratkeri.