Talantqa taǵzym

Aqyn Qasym Amanjolovtyń 100 jyldyǵy Almatyda qorytyndylandy «Dúnıege keler áli talaı Qasym» degen atpen bıyl Astanadaǵy Prezıdenttik mádenı ortalyǵy­nan bastaý alyp, elimizdiń ár shalǵaıynda atap ótil­gen Qasym Amanjolovtyń ǵasyrlyq mereı­toıy osy aptada arý qalamyz Almatyda qorytyndylandy. Aqynnyń ózi jyrlaǵan, tirshilik teperishin kórse de tastamaǵan Almatysyndaǵy jyr keshi bekzat óner ordasy – Abaı atyndaǵy Qazaq memlekettik akade­mııalyq opera jáne balet teatrynda ótti. Ońtústik astana zııalylaryn bir jerde toǵystyrǵan keshte Ja­zýshylar odaǵynyń tóraǵasy Nurlan Orazalın sóz alyp, qalam ustaǵan qaýymnyń jaqsy sózin jetkizdi. – Qasym Abaıdyń asqaq tulǵasyn, Mahambettiń órshil rýhyn boıyna birdeı sińirip alǵandaı elesteıdi. «Berseń ber, bermeseń qoı baspanańdy, sonda da tastamaımyn astanamdy», dep rýhyn alasartpaı, asqaq ustaǵan aqyn nebári 44 jyl ǵumyr kesh­ti. Alaıda, aqynǵa kelte ǵumyr 7-8 poemasy men alýan taqyryptaǵy lırıkadan quralǵan ádebı mol mura syılady. Ol án bolyp órildi, kúı bolyp tógildi, – dedi ol. Bul joly Almaty qalasy ákimdigi uıytqy bol­ǵan keshte óner sheberleriniń oryndaýynda aqyn­nyń óleńderine jazylǵan «Aq sáýle», «Jas dáý­ren», «О́zim týraly» ánderi oryndaldy. Aqynnyń ómiri men shyǵarmashylyǵynyń túrli kezeńderine arnalǵan teatrlandyrylǵan shaǵyn qoıylymdar kór­setildi. Aqyn týraly estelikter aıtylyp, ol tý­raly jańa derekti fılmnen úzindiler kórsetildi. Qoryta aıtqanda, Qasym Amanjolovtyń shyǵarmashylyǵy árqashan jyrsúıer qaýymnyń jadynda saqtala bermek, jattala bermek. Munyń bir dáleli – ústimizdegi jyly aqynnyń tórt kitaby jaryq kórdi. Onyń ómiri men shyǵarmashylyǵy týraly birneshe derekti fılmder túsirildi. Aınash ESALI, Almaty.