Bul baǵdarlamany Eýropalyq odaq qarjylandyrady ári ol Ortalyq Azııadaǵy qarjy ınstıtýttarynyń qyzmetkerlerin onlaın oqytýǵa múmkindik beredi. Baǵdarlamany ázirleýshiler dáris alýshylarǵa yńǵaıly bolý úshin derbes qurylǵylarda oqytýdy da eskergen.
Osynaý aımaqtyq baǵdarlama shaǵyn bıznesti qarjylandyrý salasyna noý-haý engizýdi qarastyrady.
Baǵdarlamanyń tusaýkeserine EO, EQDB, Qazaqstan Úkimeti men Ulttyq banki, halyqaralyq uıymdar jáne qarjy ókilderi qatysyp, «Bank salasynyń bolashaǵy jáne qarjy qyzmetterin usyný» taqyrybynda pikir almasty.
Sol sııaqty osy baǵdarlama sheńberinde Ortalyq Azııada mıkro, shaǵyn jáne orta kásiporyndardy qarjylandyratyn qarjy ınstıtýttaryna arnalǵan bilim almasý platformasy da iske qosylmaq. Saıt jergilikti qarjy ınstıtýttaryna osy saladaǵy EQDB tájirıbesimen tanysyp, túrli taqyryptaǵy trenıngterden ótýge jol ashady.
Qazirdiń ózinde platforma shaǵyn jáne orta kásiporyndardyń nesıe tóleýge qabilettiligin saraptaıtyn trenıngter usynýda. Biraq bilim almasý baǵdarlamasy ishinara qoljetimdi. Aldaǵy kúnderi Ortalyq Azııa elderinde onlaın oqytýdyń júıesi tolyqqandy jumys isteıtin bolady. Bıylǵy jyldyń ortasyna qaraı qyzmetkerlerdi sertıfıkattaýdyń onlaın-baǵdarlamasy iske qosylady.
Baǵdarlama keńesshisi – IPC (Internationale Projekt Consult GmbH) kompanııasy. IPC shaǵyn jáne orta bıznesti qarjylandyrýǵa baılanysty jobalar men oqytý baǵdarlamalaryn jasaý jáne júzege asyrýda mol tájirıbege ıe kompanııa.
Sondaı-aq bul baǵdarlamaǵa Qazaqstandaǵy «Damý» kásipkerlikti damytý qory» AQ seriktes bolady. Atalmysh qordyń elimizdiń búkil aımaǵynda fılıaldary bar. Ári «Damý» bıznespen, qoǵamdyq uıymdarmen jáne jergilikti atqarýshy bılikpen yntymaqtastyqta aıtarlyqtaı tájirıbe jınaqtap úlgergen.
Tusaýkeser barysynda Eýropalyq odaqtyń Qazaqstandaǵy О́kildiginiń senimdi ókili Zoltan Salaı «Qazaqstandaǵy mıkro, shaǵyn jáne orta kásiporyndardyń eń basty qıyndyqtarynyń biri qarjyǵa qol jetkizý. MShOK-ty qoldaý ekonomıkany ártaraptandyrý men ınnovasııany ilgeriletýde óte mańyzdy. Buǵan deıin EO jáne EQDB kómegimen basqa aımaqtarda júzege asqan bastama jaqsy nátıjelerge qol jetkizdi. Biz Ortalyq Azııadaǵy shaǵyn bıznesti damytý baǵdarlamasy Qazaqstanda týra sondaı jemisti bolatynyna senimdimiz», dedi.
EQDB-nyń Qazaqstandaǵy basshysy Agrıs Preımanıstiń sózine qaraǵanda, buǵan deıin shaǵyn jáne orta bıznesti qarjylandyrý jónindegi oqytý baǵdarlamalary Ortalyq Azııanyń qarjylyq ınstıtýttary arasynda aıryqsha tanymal bolǵan. О́ıtkeni baǵdarlama zamanaýı tehnologııalardy paıdalanyp qana qoımaı, Ortalyq Azııanyń aýqymdy aýdıtorııasyn qamtýdy kózdeıdi. Nátıjesinde bul MShOK-ty qarjylandyrýǵa qatysty baǵdarlamalardy jaqsartyp, tıimdi etpek.
«Damý» qorynyń basqarma tóraǵasy Abaı Sarqulov «Mıkro, shaǵyn jáne orta bıznesti qarjylandyrý jáne olarǵa qyzmet kórsetý salasynda bilim almasý, oqytý jáne testileý úshin sıfrly platforma qurý – qarjy sektory mamandaryna bıznesti damytý maqsatyndaǵy qarjylyq jobalardy daıyndaý barysynda irikteý negizderin durys túsinýge múmkindik beredi», deıdi.
Aınash ESALI,
«Egemen Qazaqstan»
ALMATY
