Qumar Irgebaıuly onyń ótinishin qabyldap, jýyrda aýdan aktıvin jańa ákimmen tanystyrdy. Ol óz sózinde jergilikti kadrlardyń áleýetine súıenetinin, alaıda júktelgen tapsyrmalar údesinen kórine almaǵan basshylarǵa eshqandaı jeńildik te, artyqshylyq ta jasalmaıtynyn qadap aıtty.
– Taıynsha – aımaqtaǵy irgeli aýdandardyń biri. Agroónerkásiptik keshendi damytýdyń áleýeti joǵary, ınvestısııa tartý múmkindikteri mol. Shıkizatty óńdeý, balamaly energııa kózderin engizý, tyń jobalardy júzege asyrý tegeýrindi qımyldy qajet etedi, – deı kelip, Q.Aqsaqalov buǵan deıin Ǵ.Músirepov aýdanyna jetekshilik etip kelgen Vladımır Dýdovtyń Taıynsha aýdanynda aýqymdy sharalardy atqarýǵa biligi de, tájirıbesi de jetetinine senim bildirdi. Oǵan eńbekkerlerdiń jalaqysyn kóterý, ınvestısııa kólemin ulǵaıtý, joldardy qalpyna keltirý syndy birqatar tapsyrmalar júkteldi. Munda sút óńdeıtin jáne suıyq tyńaıtqyshtar shyǵaratyn zaýyttar salynady. Krahmal, glıýten ázirleıtin jeliler iske qosylady. Bir sózben aıtqanda, jumys isteýge talaby taýdaı basshyǵa aralasatyn salalar jetip artylady.
Aımaqtyń ekonomıkalyq damýynyń negizgi baǵyttary belgilengen apparattyq keńeste syndardyń bir bóligi Mamlıýt aýdanynyń ákimi Erbolat Bekshenovke qarata aıtylǵan edi. Ásirese jańa jumys oryndaryn ashýdaǵy olqylyqtar, ındýstrııalyq-ınnovasııalyq damý baǵdarlamasynyń ekinshi besjyldyǵyna birde-bir jobanyń enbegeni kózge shuqyp kórsetilgen. Jyl basynda ótken ákimdik otyrysynda jergilikti bıýdjetke josparly salyq túsimin qamtamasyz ete almaǵany, ınvestısııa jaıynyń aqsap turǵany, oblys kórsetkishin tómendetip turǵan eki aýdannyń biri ekeni E.Bekshenovtiń betine taǵy basylǵan. Osy jaıttar eskerilgen bolý kerek, kadrlyq aýys-túıistiń nátıjesinde memlekettik qyzmetti eń tómengi býynnan bastap Aqjar aýdany ákiminiń orynbasarlyǵyna deıin kóterilgen Jastilek Syzdyqov jańa laýazymǵa ıe boldy. Qumar Irgebaıuly aýdanda sút óńdeıtin jalǵyz sharýashylyq qana jumys isteıtinin, bıznes-áriptestermen tyǵyz baılanys ornatý kerektigin, bıyl ońtústik óńirlerden kóship keletin 59 otbasyǵa barlyq áleýmettik kómekti jasaý, jumysqa ornalastyrý qajettigin eske saldy.
E.Bekshenov jer qatynastary basqarmasyn basqarýǵa jiberildi. Shamasy onyń taǵy bir syn tezinen súrinbeı ótýine sońǵy múmkindik berilgen sekildi. Sharýashylyqta ábden ysylǵan Bolat Jumabekov Ǵ.Músirepov aýdanyn basqarýǵa joldansa, ındýstrııalyq-ınnovasııalyq damý basqarmasynyń jetekshisi Janat Sádýaqasov Qyzyljar aýdany ákiminiń oryntaǵyna jaıǵasty.
Jańa atqaminerlerdi alda úlken synaqtar kútip tur. Máselen Hasan Bekturǵanov atyndaǵy Mamlıýt qalalyq mektebi sýyq. Plastık tereze qoıý jónindegi ótinishter qurǵaq sózden aspaı keledi. Mádenıet úıi tolyq jóndeldi degen aqparat berilgenmen, shatyry aýystyrylmaǵandyqtan jaýyn-shashyn kúnderi ǵımarat ishi sýǵa tolyp ketedi. Halyqty sapaly aýyz sýmen qamtý Qyzyljar aýdany turǵyndarynyń basty muńyna aınalǵan.
Kórsetilgen senim bar da, jaýapkershilik júgin uǵynýdyń, salmaqtap bezbenge salýdyń, soǵan oraı olqylyqtardy eńserýdiń utymdy sheshimderin qabyldaýdyń jóni bólek. Jańa atqaminerler synaq merzimine tótep bere ala ma, álde aldyńǵy áriptesi sııaqty otstavkaǵa surana ma, ýaqyt kórsetedi.
О́mir ESQALI,
«Egemen Qazaqstan»
Soltústik Qazaqstan oblysy
