Bul baǵytta birqatar jumystar atqarylyp jatyr. Aıtalyq dıspetcherlik júıe qondyrý jobasy iske qosylyp, 9 avtomattyq gaz taratýshy stansasynda jáne 17 gaz taratý pýnktinde avtomatty júıeni dıspetcherlik basqarý ornatyldy. Sol arqyly oblystaǵy aýdandar men óndiristik kásiporyndardy qosqanda 114 eldi mekendi gazben úzilissiz qamtamasyz etýge múmkindik týdy. Osyndaı sharalardyń nátıjesinde apattar sany azaıyp keledi. 2016 jyly 74 apat tirkelse, ótken jyly bul kórsetkish 18-ge kemigen.
– Atyraý óndiristik fılıaly jáne «RSKÝ-Atyraý» JShS arasyndaǵy kelisim negizinde turmystyq gaz qurylǵylary men jabdyqtardy aldyn ala tekserý jumystary júzege asyrylady, alaıda turmysta gaz paıdalaný kezinde ýlaný jaǵdaılary tirkelýde, – deıdi fılıal dırektory Maqsot Ábýov.
Jyl basynda Isataı jáne Qyzylqoǵa aýdandarynyń turǵyn úı sektorlarynda gazben ýlaný boıynsha 3 oqıǵa tirkelip, onyń ekeýi adam ólimine ákeldi.
Atyraý oblysy boıynsha «Servıs Aımaq Gaz» JShS, «Batys Gaz Aımaq» JShS, «Aımaq Gaz Qurylys» JShS, «Aımaq Gaz Invest» JShS sekildi basqa da tútin shyǵý murjasy men jeldetkish kanaldardy tekserý qyzmetin kórsetetin birneshe kásiporyn jumys isteıdi.
– Biraq olardyń gaz jabdyqtaryna tehnıkalyq qyzmet kórsetý kýálikteri joq jáne qyzmetteri «QazTransGaz Aımaq» AQ Atyraý óndiristik fılıalyna baılanysty emes, – deıdi M.Ábýov.
Gazdy paıdalanyp alyp, tıisti aqylaryn tólemeı otyrǵandar da bar. Búginge deıin óńirlik fılıalǵa tutynýshylardyń qaryzy 137 mln teńgeden asqan. Onyń 46 mln teńgesi bıýdjettik mekemelerge tıesili.
Baqytgúl BABASh,
«Egemen Qazaqstan»
ATYRAÝ
