Jıynda «Qazkontent» AQ basqarma tóraǵasy Evgenıı Kochetov: «2017 jyl «Qazkontent» AQ úshin tabysty boldy. Alǵa qoıylǵan mindetter oryndalyp, josparlanǵan jobalar júzege asty. Sonymen qatar 2018 jyly «Qazaqstannyń 100 jańa esimi» jalpyulttyq jobasy aıasyndaǵy jumystar jalǵasyn tappaq. Osyǵan saı jańa ıdeıalar men tájirıbe almasý maqsatynda oflaın is-shara uıymdastyrý, sondaı-aq Qazaqstannyń zamanaýı keıipkerleriniń ómirinen alynǵan jańa ári qyzyqty faktilerdi bilýge múmkindik beretin biregeı kontentti qurý josparlanýda», dedi.
Sonymen qatar ol «El.kz» portalynyń «Lısa Stolısy» jobasynda óziniń kúndelikti eńbegimen qalanyń damýyna óz úlesin qosqan astanalyqtar jaıly kórsetiletinin jetkizdi.
«Kaztube.kz» beıne-portaly týraly aıtatyn bolsam, osy jyldyń 25 qańtarynda bul portal «Men – mobıldi reportermin» atty konkýrstyń iske qosylýy týraly habarlady. Atalǵan joba bir aı boıy ótedi. Baıqaýdyń maqsaty – uıaly telefonǵa ınternet jelisi qoldanýshylarynyń basym nazaryna ıe bola alatyn beıneni túsirý. Al eń rezonansty vıdeo avtory 200 000 teńge kóleminde aqshalaı syılyqtyń ıegeri bolady», dedi basqarma tóraǵasy.
Odan basqa, E.Kochetov beıne-portalda «Olımpıada qatysýshylaryn qolda!» atty taǵy bir baıqaýdyń bastalǵany jaıynda habarlady. «Munda barlyq qazaqstandyqtar úshin, osy jyly ótetin qysqy Olımpııa oıyndarynyń barlyq qatysýshylaryn quttyqtap, jeńimpazdardyń qoldarynan estelik syılyqtar alý múmkindigi beriledi. Ol úshin sizge óz qolyńyzben quttyqtaý vıdeosyn túsirip, «Kaztube.kz» beıne-portalyna júktep, halyqtyq daýys berýdiń qatysýshysy bolýyńyz kerek», dedi E.Kochetov.
Raýan QAIDAR,
«Egemen Qazaqstan»
