«Qalanyń Ǵashyqtar alleıasy aýmaǵyndaǵy Ertis ózeniniń aǵysynda janarmaı daǵy paıda bolǵany týraly dabyl bizdiń ortalyqtyń «ekologııalyq saqshy» nómirine juma kúni kelip tústi. Biz jaǵdaıdy birden oblystyq ekologııa departamentine habarladyq. Sol kúni atalǵan departament pen bizdiń ortalyq mamandary oqıǵa ornyna baryp, sýdyń betinen synamalar aldy. Júrgizgen taldaýlar sýdyń quramyndaǵy munaıdyń úlesi mólsherden 60 ese artqanyn kórsetti. Aǵystyń sál joǵary bóliginde munaıdyń sýdaǵy úlesi 14 ese kóp ekeni belgili boldy», deıdi Ekologııalyq qaýipsizdik ortalyǵy JShS-niń dırektory Gennadıı Koreshkov. Ortalyq basshysy Ertiske munaı Kemejaı aýdanynan jetýi múmkin degen boljam aıtady. О́ıtkeni sol mańda qum tasıtyn qaıyqtar turady.
Ertis ózeninde oryn alǵan jaǵdaıǵa baılanysty keshe arnaıy túsinikteme bergen oblystyq ekologııa departamentiniń basshysy Dmıtrıı Kavrıgın oqıǵaǵa qatysty jedel tekserý sharalary qolǵa alynyp, sýdyń lastaný kózin anyqtaý úshin О́skemen qalasynyń ishki ister basqarmasyna hat joldanǵanyn habarlady.
«Ekologııa zańnamasyn buzýshylardy tapqannan keıin qorshaǵan ortaǵa kelgen zııan mólsherin anyqtaıtyn bolamyz. О́zenge tógilgen munaı qala turǵyndary úshin qaýip tóndirmeýge tıis. О́ıtkeni óskemendikter aýyz sýdy 40 metr tereńdiktegi jer asty sýlarynan alyp paıdalanady», deıdi ol.
Azamat QASYM,
«Egemen Qazaqstan»
О́SKEMEN
