Qaısarlyqtyń qashanda qasıeti joǵary. Tumar patshaıymnyń bul kóregendigi álemdegi júzdegen qalamgerlerdiń, tarıhshylardyń shyǵarmalarynda kórkemdik ádispen beınelendi. Urpaqtar sanasynda eldik múddeni saqtap qalýdaǵy erlik bolyp qalyptasty. Tumar patshaıymnyń qaısarlyǵy men sulýlyǵy da Bolat Jandarbekovtiń «Saqtar» romanynda kórkem beınelengen edi. Jambyl oblystyq qazaq drama teatrynda atalǵan roman jelisi boıynsha «Tomırıs» tarıhı dramasy sahnalandy. Al dramanyń qoıýshy rejısseri astanalyq Dına Jumabekova boldy. Sondaı-aq sýretshi Rahat Saparalıevanyń jan-jaqty sheberligi kórermendi saqtar dáýirinde júrgendeı áserge bóledi.
Eń bastysy, sahnalyq qoıylymda erkindik oryn alǵan. Kóp jaǵdaıda tarıhı sheshimder sózben ǵana emes, áreketpen de berilip otyrdy. Tumar patshaıymnyń beınesin somdaǵan Anar Saǵymbekova qımylymen de, sózimen de kórermendi tánti etti. Áıel zaty qansha jerden názik desek te, el men jerdi qorǵap qalýdaǵy qataldyqty aktrısa Kır patshanyń basyn alý oqıǵasy kezinde taǵy bir kórsetti. О́zeýrep kelip, ólim qushqan Kırdiń beınesin somdaǵan Kenen Aqúrpekov, Rýstam rólindegi Mámbet Qojalıev te kórermendi kóne dáýirge tartqandaı boldy.
Drama rejısseri Dına Jumabekovanyń aıtýynsha, shyǵarmashylyq ujym bir aı boıy birlese eńbektengen. Al teatr dırektory Bolat Bekjanov qoıylymnyń sátti shyqqanyn sóz etip, aldaǵy ýaqyttarda «Tomırıs» tarıhı dramasynyń teatr tórinen tabylatynyn aıtty.
Hamıt ESAMAN,
«Egemen Qazaqstan»
Jambyl oblysy
