Ras, mundaı oranjereıa elimizdiń basqa da qalalarynda bar. Biraq olar tek ǵylymı maqsatta ǵana paıdalanylady. Al aýmaǵy 2000 sharshy metrdi alyp jatqan temirtaýlyq baqtyń esigi kelem deýshilerge qashanda ashyq.
«Qysqy baqtaǵy» flora bitkenniń deni Almaty men Qaraǵandy botanıkalyq baqtarynan ákelingen. Munda qala turǵyndary syılaǵan gúl tuqymdary da bar. Sondaı-aq tanymal tulǵalar ekken ekzotıkalyq ósimdikter de jetkilikti. Mysaly, ǵaryshkerler Toqtar Áýbákirov pen Talǵat Musabaev saýyraǵash pen oleandr otyrǵyzǵan.
Mundaǵy ósimdik ataýlynyń ishindegi bıigi – qurma palmasy men vashıngtonııa. Al tómende uıysa ósken tradeskansııa gúlderiniń janyna aıaldamaı óte shyǵý tipti de múmkin emes. Kútimi óte kúrdeli gıbıskýs (qytaı raýshan gúli) gúlderi de kózdiń jaýyn alyp, adamdy kádimgideı arbaıdy.
Bir tańǵalarlyǵy, baqta jyl saıyn banan jemis beredi eken. Jeýge jaramsyz, árıne. Sándik aǵash surpynan: tekstıldi abaka. Sonymen qatar, oranjereıada zoologııalyq burysh ta bar. Kelýshiler munda taýys, qoıan, kirpi jáne basqa da janýarlardy tamashalaı alady.
Ekzotıkalyq ósimdikterdi baptaý ońaı sharýa emes. Baqtyń ishinde 12 gradýstan tómen túspeıtin jylylyq árdaıym saqtalýy tıis. О́simdikterdiń barlyǵy da qolmen sýarylady. Osy jáne basqa da uqyptylyq pen yqtııattylyqty qajet etetin jumystyń barlyǵyn eki-aq adam – agronom Botagóz Táshenova men onyń kómekshisi atqarady.
Mereıtoı jyly jabaıy tabıǵattyń ózinde óte sırek gúldeıtin shefflera da búr jaryp, tosynsyı jasapty. «Shefflerany osydan 10 jyl buryn bizdegi dástúr boıynsha jas jubaılar otyrǵyzǵan bolatyn. Jaqynda qarasaq, búr jara bastapty. Bul degenińiz úlken qýanysh boldy, sebebi shefflera bizde alǵash ret gúldedi», deıdi Botagóz Táshenova qýanyshyn jasyra almaı.
Qaırat ÁBILDA,
«Egemen Qazaqstan»
Qaraǵandy oblysy,
Temirtaý qalasy
