Jıynǵa aýǵan soǵysynyń ardagerleri, jaýynger-ınternasıonalısterdiń analary men jubaılary, qoǵam jáne memleket qaıratkerleri, tarıhshylar men Qorǵanys mınıstrliginiń ókilderi, stýdentter men oqýshylar qatysty. Is-sharany ótkizýdegi basty maqsat – aýǵan soǵysynda mert bolǵan sarbazdar men jaýyngerlik is-qımyldarǵa qatysýshylardyń rýhyna taǵzym etip, óskeleń urpaqty olardyń esimderin qasterleýge tárbıeleý.
Kezdesýde Ulttyq arhıvtiń bas dırektory, aýǵan soǵysy ardageri Jangeldi Mahashov estelikterimen bólisip, elimizde jaqsylyq pen beıbitshilik bolýyn tiledi. Sondaı-aq jıyn barysynda Elbasynyń bıylǵy Joldaýynda aıtylǵan on mindettiń mańyzdylyǵy atap kórsetildi.
«Soǵystyń zardaby qandaı bolatyny áli kúnge kóz aldymda. Sol bir aýyr jyldardy esime ala otyryp, búgingi bizdiń beıbit te tynysh qoǵamymyzǵa qarap shúkir deımin. Munyń bári Elbasynyń sarabdal saıasaty men el basqarýdaǵy kóregendiginiń arqasy. Sondyqtan qazaqstandyq armannyń oryndalýy jolynda aıanbaı eńbek etýge tıispiz», dedi J.Mahashov.
Keńes Odaǵynyń áskeri 1979 jylǵy 25 jeltoqsanda aýǵan jerine kirgizilgen bolatyn. On jylǵa sozylǵan merzim ishinde is-qımyldarǵa 22269 qazaqstandyq qatysty. Solardyń 924 qaza tapsa, 1015 múgedek bolyp oraldy. Al 21 jaýynger iz-tússiz joǵaldy. Jalpy, Aýǵanstandaǵy soǵysqa 620 myńǵa jýyq Keńes áskeri qatysty. Qazirgi tańda elimizde on myńǵa jýyq aýǵan ardageri bar. Solardyń úsh myńnan astamy múmkindigi shekteýli jandar qataryna kiredi.
Abaı ASANKELDIULY,
«Egemen Qazaqstan»
