Baǵdarlama elimizdiń erteńgi temirqazyǵy bolǵandyqtan onda negizgi ózekti máseleler qolǵa alynady.
OQO óńirlik kommýnıkasııalar qyzmetinde ótken brıfıngte oblystyq «Rýhanı jańǵyrý» jobalyq keńseniń basshysy Baqytjan Áshirbekov osy jaıly tolyǵyraq baıandady. Máselen, oblysta qasıetti jerlerdiń tizimin qalyptastyrýǵa usynystar ázirleıtin óńirlik jumys toby qurylyp, kıeli jerlerdiń óńirlik kartasynyń jobasy jasaldy. Qazirgi tańda «Qasıetti Qazaqstan» ortalyǵymen jalpy respýblıka boıynsha 100 nysan iriktelip alynsa, onyń ishinde Ońtústik Qazaqstan oblysynan 25 nysan engizilgen bolatyn. Oblys kóleminde baǵdarlamalyq maqalanyń basymdyqtaryn júzege asyrý boıynsha «Túrkistan – túrki áleminiń mádenı astanasy» jobasyn erekshe ataýǵa bolady. Munyń aıasynda 40-tan astam shara ótkizildi.
– Oblysta «Týǵan jer» arnaıy jobasy boıynsha 50 joba daıyndalyp, 150-den asa is-shara júzege asyrylýda. Sondaı-aq kásipkerler men demeýshilerdiń qatysýymen 31 mlrd 467 mln teńgeni quraıtyn 577 óńirlik joba júrgizilip keledi. Onyń ishinde 2017 jyly 6342,8 mln teńgege 473 nysan aıaqtalyp, paıdalanýǵa berildi. Jalpy «Rýhanı jańǵyrý» baǵdarlamasy endi jańa jobalar boıynsha júrgiziledi, – dedi Baqytjan Áshirbekov.
Sonymen qatar oblys basshysy Janseıit Túımebaevtyń qoldaýymen tarıhı-mádenı muralarymyzdy nasıhattap, jastarǵa patrıottyq tárbıe berý maqsatynda «Kóne jetigenniń syry» atty 10 serııaly telehıkaıa, «Kıeli Qazyǵurt», «Otyrardy qorǵaý», «Kúsh atasy – Qajymuqan» atty anımasııalyq jáne «Uly Jibek jolyndaǵy eskertkishter» syndy derekti fılmder túsirilip, el nazaryna usynyldy
Bul rette oblystaǵy «Saq» kınostýdııasynyń ónimdi eńbegin atap ótýge bolady. Birneshe halyqaralyq baıqaýda jeńimpaz atanǵan kınostýdııa anımasııa salasynda jaqsy dúnıeler usynyp júr.
Halyqaralyq sarapshylar «Saq» stýdııasy týyndylarynyń negizinde patrıottyq rýhtyń basymdyǵyn, ony bir ultqa telinbeıtin, dúnıe júzindegi barlyq halyqtarǵa rýhanı qazyna ekendikterin aıtqan. Iаǵnı, baǵdarlamada aıtylǵan otanshyldyq ıdeıasy kınokompanııa ónimderinde kórinis taýyp jatyr.
Bul baǵyttaǵy jumystar oblysta kezeń-kezeńimen jyl boıy jańa jobalarmen tolyǵady.
Baqtııar TAIJAN,
«Egemen Qazaqstan»
Ońtústik Qazaqstan oblysy
