Mundaǵy óndiris oryndary kentke qamqor, júıe quraýshy kásiporyndar sanalady. Kenttiń jylý qubyry sýmen jabdyqtaıtyn Ekibastuz – Maıqaıyń aralyǵyndaǵy sý taratqysh, kent ishilik sý taratqysh qubyrlary ýaqytsha senimgerlik basqarýǵa «Maıqaıyn Altyn» AQ-qa berilgen. Káriz júıelerimen «Aýhal» JShS jumys júrgizýde. Jýyrda Maıqaıyńda «Nurbóbek» balabaqshasy ashyldy. Onyń qurylysyn merdiger «B-ADK» seriktestigi júrgizdi.
Balabaqsha meńgerýshisi Roza Ǵalymjanovanyń aıtýynsha, ata-analardyń deni «Maıqaıyń Altyn» AQ ken baıytý kombınatynda, basqa da kenishterde eńbek etedi. Sondyqtan kenshiler otbasy erekshe qýanyshty. Endi 110 bala jas erekshelikterine qaraı 6 topqa bólinip tárbıelenedi. Mılana, Arsenıı, Iаroslav sııaqty balalar da qazaq tilindegi toptarǵa kelipti. Búldirshinder arasynda Gúlzar Mýhammad, Iýsýf Hasanuly degen tegi pákistandyq bala da bar. Gúlzardyń ákesi Raza Hasannyń mamandyǵy dáriger-hırýrg, Pákistanda turady. Al anasy Elmıra Rahmetqyzy Keregetas kenishinde qyzmet etedi. Anasy men ákesi Qaraǵandyda tanysyp, otbasyn qurǵan eken. Balabaqshaǵa ázerbaıjan balasy Mansur da kelipti.
Munda oqý jáne tárbıe jumystary memlekettik tilde júrgiziledi. Aǵylshyn tili boıynsha Gúlmıra Qamash, orys tilinen Aıdana Sezqyzy sabaq beredi. Balabaqshadaǵy 24 pedagogtyń ishinde 15 arnaýly orta, 8 joǵary bilimdi pedagog bar. Jalpy, qyzmetkerler sany – 51. Onyń 43-i Maıqaıyń kentiniń Jumyspen qamtý ortalyǵynan jiberilgen. Balalarǵa barlyq jaǵdaı jasalǵan. Beıimdeý, densaýlyqtaryn túzetý, damytý, logoped, úıirme, psıholog kabınetteri bar. Aldaǵy ýaqytta shahmat, qolóner, bı, sýret úıirmelerin ashý josparlanýda.
Negizgi baǵytymyz – balanyń jeke tulǵa retinde damýyna tıimdi jaǵdaı týǵyzý. Oqý-tárbıe úderisinde aqparattyq tehnologııany (kompıýterlik, mýltımedııalyq qural) paıdalanamyz. Aqparattyq tehnologııanyń maqsaty tárbıelenýshilerdiń zeıinin, bilim-bilik daǵdylaryn qalyptastyrý, aqyl-oıyn damytýǵa kómektesý, – deıdi Roza Dáýletqyzy.
Balabaqshaǵa oblys ákimi Bolat Baqaýovtyń atynan mýzykalyq keshen syıǵa berilipti. Kishkentaı Káýsar Baýyrbekqyzy atalǵan qurylǵymen án oryndap berdi.
Jalpy, kenshiler kentinde 245 bala baratyn 3 balabaqsha jumys isteıdi. Balalar óner mektebinde 177 oqýshy bilim alsa, «Jasybaı» balalar sport mektebiniń fılıalynda 11 jattyqtyrýshy 312 balany sportqa baýlýda. Kentte «Kenshi» mádenı-saýyqtyrý ortalyǵy bar. Bıyl «Dıplommen – aýylǵa!» baǵdarlamasymen kelgen jas mamandarmen mektepter de tolyǵyp otyr.
Farıda BYQAI,
«Egemen Qazaqstan»
Pavlodar oblysy,
Maıqaıyń kenti
Sýretti túsirgen Ásel ÁLIMQYZY
