«Astanaǵa» basymdyq beretin faktorlar
Áńgimemizdiń álqıssasyn elordalyqtardan bastasaq. Ataǵynan at úrketin qarsylas bolsa da komandamyz qaımyǵatyn keıip tanytpaıdy. Ol durys. Shyntaýaıtyna kelgende, bizdiń jigitterge joǵaltatyn eshnárse joq. Onsyz da tarıhı jetistikke jetti. Qarsylastyń qaı jaǵyn alsańyz da bizdiń komandadan myqty ekenin bolgar mamany moıyndap otyr. «Kezdesýdiń favorıti «Sportıng» ekeni belgili. Biraq, meniń shákirtterim shaıqasqa daıyn», dedi keshegi baspasóz maslıhatynda. Stoılovtyń saspaı júrýiniń syry nede? «Astananyń» jeńiske jetý múmkindigi qandaı?
Birinshiden. Sıntetıkalyq alań. «Sportıng» sıntetıkalyq alańnyń ne ekenin de bilmeıdi. «Maǵan salsa, mundaı alańda oınaýǵa múlde qarsymyn», dep narazylyǵyn bildirdi Jorjı Jezýsh. «Bizdiń mamandar 10 kún aldyn kelip, barlyǵyn zerttedi. Bizde tolyq aqparat bar», dep qaldy lıssabondyqtardyń bapkeri. Bul neni bildiredi? Bir jaǵynan qarsylasqa degen qurmet, ıaǵnı qalpaqpen qaǵyp alamyz degen oıdan ada ekendikterin, ekinshi jaǵynan fýtbolda usaq-túıektiń bolmaıtyndyǵyn kórsetedi. Alańnyń sapasyn, ár buryshyn, útir, núktesine deıin zerttep barlyq aqparatty aldyn ala bilip otyr. Demek, sıntetıkalyq alańda oınaýǵa degen alańdaýshylyq bar. Eger, «Astana» fýtbolshylary bul faktordy tıimdi paıdalansa jaqsy nátıjege qol jetkizýge bolady.
Ekinshiden. Jankúıerler. Anshlag bolatyny anyq. Osyndaıda «Abylaıdyń asynda shappaǵanda, atańnyń basynda shabasyń ba» degen qazekeminiń sózi eske túsedi. «Astananyń» óz alańynda jeńilissiz serııasyn 17 oıynǵa jetkizýi jankúıerlerdiń arqasy dep bilemiz. «Astana-Arenaǵa» ár oıyn saıyn otyz myńǵa jýyq jankeshti jankúıer jınala bermeıdi. Búgingi kezdesýdiń mańyzdylyǵy erekshe.
Úshinshiden. Stanımır Stoılov. Sıqyrshy Stoılovtyń bir oılaǵany bolý kerek. Bolgar bapkeriniń biliktiligine eshkim syn aıta almaıdy. «Oqý-jattyǵýda tyńǵylyqty daıyndaldyq. Oıynshylarym sizderdi jerge qaratpaýǵa tyrysady», dedi senimmen keshe Stanımır. Bolgar bapkeriniń osy baısaldylyǵy kópshilikke unaıdy. Kóp sózge joq. Qyrsyqtaý mineziniń bary ras. Degenmen, sol minezdiń, salmaqtylyqtyń arqasynda talaı myqtylardy san soqtyrdy. Bul jolǵy konferensııada da tyń ıdeıanyń, ózindik ózgeristerdiń lebi bolatynyn bildirgendeı boldy.
«Sportıng» búgin jeńiske jetýi múmkin be?
Birinshiden. «Sportıngtiń» balalar akademııasy əlemdegi eń myqty mektepterdiń biri sanalady. Bul kórsetkish boıynsha lıssabondyqtarmen áıgili «Aıaks» ǵana sanasa alsa kerek. Búgingi tańdaǵy əlemniń eń úzdik oıynshylardyń biri Krıshtıaný Ronaldý dál osy portýgalııalyq klýbtyń túlegi. Az deseńiz, Lýısh Fıgý, Lýısh Nanı, Rıkardý Kýarejma sekildi myqtylar túlep ushqan akademııa. «Sportıngte» sporttyq menedjment, ınfraqurylym, jasóspirimderge jaǵdaı jasaý jaǵy óte joǵary deńgeıde qarastyrylǵan.
Ekinshiden. «Sportıng» Eýropa lıgasynyń fınalynda eki ret oınaǵan ujym. Eki ret utylsa da, aqtyq synǵa deıin jetýdiń ózi úlken nətıje. Təjirıbe jeterlik. «Lıssabondyqtar negizgi kúshti ishki birinshiliktiń oıyndaryna salady. Eýropa lıgasy olarǵa mańyzdy emes», dep keıbir fýtbol sarapshylary beker aıtady. Jezýsh keshe jýrnalısterge jetkilikti derektermen jetkizdi. «Portý», «Benfıka» sekildi grandtar bar. Qaı jarysta oınasaq ta barynsha jeńiske jetýge tyrysamyz», dedi portýgalııalyqtardyń bas bapkeri. Sondyqtan «Sportıng» bul joly da bar kúsh-jigerin salary anyq. «Astanamen» salystyrǵanda tájirbıesi moldaý. Mine, dál osy faktor búgingi kezdesýde sheshýshi ról atqarýy múmkin.
Úshinshiden. Jekelegen fýtbolshylardyń myqtylyǵy. Karvalıý, Martınes, Koentraý, Dýmbııa sekildi myqty oıynshylary bar. Keshegi baspasóz máslıhatynda Jorshı Jezýshtiń komandasyna senimdi ekeni baıqaldy. «Astanaǵa» degen qurmet erekshe. Alaıda, moıyndaý kerek, olardyń tájirbıesi, deńgeıi búgingi qarsylastarynan bir saty tómen. Bizdiń tujyrym osy.
Qorytyndy. «Sportıng» myqty qarsylas. Qarsylastarymyz jerebede «Astanaǵa» túskende asa qýana qoımady. Joldyń alystyǵy, aýa-raıynyń sýyqtyǵy olarǵa qol emes. Fýtbolda usaq-túıek bolmaıtynyn joǵaryda aıttyq. Bizdiń komanda barlyq jaǵdaıdy saralap, durys qorytyndy shyǵarady dep úmittenemiz. Daıyndyqqa da ýaqyt jetkilikti boldy. Endeshe, búgin bizdiń jigitter aıanyp qalmaıtyny anyq. Tarıhı jetistik, jalǵasyn tapsa dep tileıik!
Erkebulan JOMART,
«Egemen Qazaqstan»
