Sýretti túsirgen Talǵat Aıtbaı
Uıymdastyrýshylardyń aıtýynsha festıvaldiń maqsaty-ózge ult ókilderi arasynan ánshi, bıshilerdi tańdap alý, Astanaǵa arnalǵan óleńder oryndaý,qazaq tilinde óner kórsetý, shyǵarmashylyq ujymdardyń kásibı-mádenı deńgeıin baǵalaý jáne birlestikterdiń ózara bir-birimen rýhanı-dostyq baılanystaryn jalǵastyrý.
Festıval ótken qalalyq mádenıet saraıynda etno-mádenı birlestikterdiń kúndelikti atqaratyn jumystaryna arnalǵan kórme uıymdastyryldy. Kórmede etnos ókilderi ózderiniń ulttyq taǵamdaryn, qolóner buıymdaryn kelýishlerdiń nazaryna usyndy. Bul kúni oblys ortalyǵynyń basqa da shyǵarmashylyq óner ujymdary óz ánderin, bıleri men aspaptyq oryndaýlaryn kórsetti. Endi tańdaýly óner ujymdary, jeke oryndaýshylar 1 naýryz «Qazaq halqyna rahmet aıtý kúnine» arnalǵan gala-konsertke qatysady.
- Bul festıvalda án aıtyp, bı bıleıdi, árbir ulttyń salt-dástúrleri kórsetildi. Biz ánderimizdi súıikti Astanaǵa arnadyq. Barlyq etno-mádenı birlestikter ujymdary búgin jańa kıimde jarqyrap shyqty. Bizge qoldaý kórsetken oblystyq ákimdikke rahmet. Ekinshiden, etno-mádenı birlestikterdiń qoldanbaly óneri, qolónerleri jáne ulttyq taǵam túrleri kelýishlerdi tańqaldyrdy. Eń bastysy-bul kóp ultty elimizdegi turaqty tynyshtyq ómirdi saqtap, ortaq úılesim jasaýynda, - deıdi Belorýs etno-mádenı birlestiginiń tóraıymy Lıýbov Bognat.
Farıda Byqaı,
«Egemen Qazaqstan»
Pavlodar
