inform.kz
Osy sala basshylyǵyna jańadan taǵaıyndalǵan M.Ábilqasymova budan birneshe kún buryn vedomstvonyń jumys josparlary týraly jıyn ótkizýi muń eken, jýrnalıster ony qazaqsha bilmeıdi dep aıyptaǵan bolatyn. Budan qorytyndy shyǵardy ma, mınıstr alqa otyrysyn tek qazaqsha júrgizip, baıandamasynyń jartysyn da memlekettik tilde oqydy.
Sonymen áýeli mınıstrliktiń ótken jyly atqarǵan sharýalaryna toqtalǵan M.Ábilqasymova byltyr eńbek naryǵyndaǵy kórsetkishter tolyǵymen jaqsarǵanyn, jumyssyz turǵyndardyń sany sońǵy on jyl ishinde 180 myńǵa azaıǵanyn atap ótti. Búginde elimizdegi jumyssyzdyq deńgeıi – 4,9 paıyzdy qurap otyr. Mınıstrdiń aıtýynsha, bul táýelsizdik alǵan jyldar ishindegi eń tómengi kórsetkish eken. Al áıelder men jastar arasyndaǵy jumyssyzdyq deńgeıi 5,4 paıyzdy qurasa, jumys kúshiniń sany 8 980 adamǵa jetken. Qazirgi tańda jumys isteıtinderdiń qatary 1,8 paıyzǵa ósse, ózin ózi jumyspen qamtyǵan adamdardyń qatary 4,5 paıyzǵa azaıǵan.
Bir jumyskerdiń ortasha aılyq jalaqysy 147 988 teńgege jetip, 3,6 paıyzǵa artqan. 2017 jyldyń 11 aıyndaǵy baǵalaý boıynsha turǵyndardyń jan basyna shaqqandaǵy nomınaldy tabysy 6 paıyzǵa ósip, 79 727 teńgeni qurapty. Osylaısha memleket byltyr áleýmettik mindettemelerdiń bárin oryndaǵan kórinedi. Osy maqsattarǵa respýblıkalyq bıýdjetten 2,1 trln teńge bólingen.
Budan keıin mınıstr bıyl qolǵa alynatyn jumystarǵa toqtaldy. Mınıstrlik aldynda turǵan mindetterdi júzege asyrý barysynda Elbasynyń Joldaýynda aıtylǵan tapsyrmalardy basym baǵyt retinde ustanatynyn aıtqan M.Ábilqasymova eń birinshi halyqty nátıjeli jumyspen qamtýǵa kóbirek kóńil bólinetinin jetkizdi. Osy oraıda negizgi tetik retinde «Nátıjeli jumyspen qamtý men jappaı kásipkerlikti damytýdyń 2021 jylǵa deıingi memlekettik baǵdarlamasy» basshylyqqa alynbaq. Atalǵan baǵdarlama bıyl 571 myń adamdy qamtyp, sonyń ishinde jumyssyz júrgen, ózdiginen kún kórip júrgen 300 myńnan astam azamatty turaqty jumysqa ornalastyrýdy kózdep otyr. Ásirese kásibin ashqysy kelgen jandarǵa qoldaý kórsetilmek. Jobamen bıyl 7,5 myń azamatqa shaǵyn nesıeler berilip, 3 myńyna qaıtarymsyz grant usynylmaq. Buǵan qosa 15 myń qazaqstandyq «Atameken» UKP jobalary boıynsha bıznes negizderine oqytylatyn bolady.
Jumystyń ekinshi baǵyty – eńbek qatynastaryn rettep, memleket, jumys berýshi men jumysshy arasynda áleýmettik dıalog qurýdy nyǵaıtý. Mınıstrdiń aıtýynsha, byltyr jalaqy qaryzy 3 mlrd teńgeni quraǵan. Eńbek ınspektorlarynyń aralasýymen 25 myń eńbekkerdiń aılyq jalaqysy ońynan sheshilgen. Al búginde jalaqy qaryzy 2,2 mlrd teńgeni qurap otyr.
Úshinshi baǵyt – áleýmettik qamsyzdandyrý men áleýmettik kómek ekenin atap aıtqan mınıstr bıyl 1 shildeden bastap, I top múgedekterin bala kezden qarap otyrǵan tulǵalarǵa jańa járdemaqy túri beriletinin jetkizdi. Boljam boıynsha, járdemaqynyń bul túrin 14 myńdaı otbasy alatyn bolady. Búginde zańdaǵy bul ózgerister Parlament Májilisiniń qaraýynda jatyr.
Tórtinshisi – áleýmettik qyzmetter júıesin damytý jáne bul qyzmetter túrin sıfrlandyrýǵa sáıkes elektrondy formatqa kóshirý. Ol úshin biryńǵaı aqparattyq júıe qurylmaq. Qazirdiń ózinde elimizdiń tórt óńirinde elektrondy eńbek bırjasy jumys istep, oǵan jumyspen qamtýǵa qatysty 200 qyzmet qosylǵan. Endi elektrondy eńbek kelisimderin esepke alatyn, eńbek kitapshasyn elektrondy nusqaǵa kóshiretin «e-HR» júıesi qanatqaqty joba retinde engizilmek.
Baıandamasyn túıindegen mınıstr ózderiniń barlyq qyzmeti halyqtyń áleýmettik jaǵdaıyn jaqsartýǵa, tabysyn arttyrýǵa baǵyttalatynyn atap ótti. Sondaı-aq Elbasy Joldaýyndaǵy tapsyrmalardy tıimdi, sapaly jáne óz ýaqytynda oryndaýǵa bar kúsh-jigerin salatynyna ýáde etti.
Alqa otyrysy óńirlerge onlaın-translıasııa arqyly kórsetildi jáne oǵan Úkimet músheleri, Parlament depýtattary, azamattyq qoǵam uıymdarynyń ókilderi qatysty.
Qymbat TOQTAMURAT,
«Egemen Qazaqstan»
