Sıfrlyq teńsizdikti joıý – ýaqyt talaby

Osyǵan baılanysty, elimizdiń aýyl­dyq jerlerin sapaly, jyldam ınternetpen qamtý máselesi alańdatýshylyq týǵyzýda. Qazaqstan Respýblıkasy Aq­parat jáne kommýnıkasııalar mı­nıstrliginiń derekterine qaraǵanda, búgin­gi tańda 1269 eldi meken ǵana jyl­dam­dyǵy sekýndyna 512 megabıt jáne odan joǵary keńjolaqty ınternetpen qamtylǵan. Qabyldanǵan «Sıfrly Qazaqstan» memlekettik baǵdarlamasynda «Qazaqstan Respýblıkasynyń aýyldyq eldi mekenderin talshyqty-optıkalyq baılanys jelileri tehnologııasy bo­ıynsha keńjolaqty ınternetke qol­jetimdilikpen qamtamasyz etý» jobasy boıynsha 1249 aýyldyq eldi meken­di 2021 jylǵa qaraı ǵana joǵary jyl­dam­dyqty ınternetpen qamtamasyz etý jo­s­par­lanǵan. Demek, aýyldyq eldi meken­derdi keńjolaqty ınternetpen tolyq qamtý áli de ózekti.

Aǵymdaǵy jyldyń qańtar aıynan bas­tap, 2 myńnan astam adam turatyn aýyldyq okrýgterde 4 deńgeıli bıýdjet engizilýde, al 2020 jyldan bastap jer­gilikti ózin-ózi basqarý bıýdjetin jap­paı engizý kózdelýde. Sondaı-aq jaqyn arada elektrondyq eńbek bırjasyn, elektrondyq densaýlyq pasportyn jáne emdelýshiniń jeke kabınetin qoldanysqa engizý josparlanyp otyr. Buǵan qosa elimizde orta bilim berý júıesin reformalaý prosesi júrgizilip jatyr, bul degenimiz elektrondy qujat aınalymyn ǵana emes, oqytýshylar men oqýshylardyń zamanaýı aqparattyq tehnologııalardy jappaı qoldanýyn qajet etedi. Al 2020 jylǵa qaraı biz mindetti áleýmettik medısınalyq saqtandyrý júıesin engizýge daıyn bolýymyz qajet.

Osy atalǵan reformalar men eli­mizdiń áleýmettik-ekonomıkalyq damýy jolyndaǵy basqa da kóptegen min­det­terdi júzege asyrý aýyldyq eldi meken­derdegi sıfrlyq teńsizdikti joı­maı, múmkin bolmaıtyny aıdan anyq. Sondyqtan kóterilip otyrǵan máse­leniń mańyzdylyǵyn eskere otyryp, biz Premer-Mınıstr Baqytjan Saǵyn­taevtyń atyna saýal joldap, tómendegi suraqtarǵa jaýap berýin ótindik:

1. Aýyldyq eldi mekenderdi keń­jolaqty ınternetpen qamtý maqsatynda iske asyrylyp jatqan memlekettik baǵdarlamalarǵa monıtorıng júrgizý jáne olardy júıelendirý jumystary Úkimettiń josparynda bar ma?

2. Atalǵan máselelerdi sheshý úshin aldaǵy eki jyl kóleminde qansha qarajat bólý kózdelgen?

3. Aýyldyq eldi mekenderdi jáne aýdandardy sapaly ınternetpen qamtamasyz etý úshin jergilikti at­qarýshy organdardyń bıýdjetinde qara­jat qarastyrylǵan ba?

Narıman TО́REǴALIEV,

Senat depýtaty