«Dostarym, sizderdi Saraıshyq qalasynyń ornyn saqtaý jáne murajaıǵa aınaldyrý jumystary barysymen tanystyrǵym kelip otyr. Esterińizge sala ketsem, qazirgi Atyraý qalasynan 50 km qashyqtyqta, Jaıyq ózeniniń oń jaǵalaýynda ornalasqan teńdesi joq kóne qoryq-murajaıdy saqtaý sharalaryn belsendi túrde qolǵa alǵanbyz. Zertteý jáne júrgiziletin jumys nysany - ózen sýy shaıyp jatqan qalanyń mádenı qabattary ornalasqan Jaıyq ózeniniń jaǵalaýy» delingen habarlamada.
Mınıstr keltirgen málimetke júginsek, jobalyq-smetalyq qujattar 2015 jyly jasalyp, odan keıingi jyldary №3 arheologııalyq qazbany saqtap qoıý jáne №5 qazbanyń ústine qalqan qurý jumystary júrgizilgen.
Al 2016 jyldyń aıaǵynda munda qalanyń mádenı qabattary bar jaǵalaýdy sý tasqynynan qorǵaý maqsatynda damba salý jumystary bastalǵan.
2017 jyly Jaıyq ózeniniń jaǵalary bekitilip, Atyraý oblysynda ornalasqan tarıhı jáne mádenı eskertkishterdi qorǵaý aımaǵy aıqyndaldy, tarıhı-mádenı mura nysandaryn izdestirý úshin dala ekspedısııalary uıymdastyryldy, Saraıshyq qalasynyń aınalasyn qorshaý jumystarynyń jobalyq-smetalyq qujattary daıyndaldy. Saraıshyq qalasyndaǵy jumystar Atyraý oblysy ákimdigi bólgen qarjyǵa jáne oblys ákimi Nurlan Noǵaevtyń bastaýymen júrgizilýde», - dep jazady Arystanbek Muhamedıuly. Sondaı-aq, mınıstr jumysty oryndaýshylar retinde Reseı federasııasynan, Astana, Almaty, Oral qalalarynan ǵalymdar men mamandar shaqyrylǵanyn atap ótken.
«Saraıshyq eskertkishterin ǵylymı jáne qaıta jańǵyrtý jumystary jalǵasa beredi, bul - ashyq aspan astynda murajaı jasaýǵa múmkindik týǵyzady. Bıyl №5 qazbada saqtap qoıý jumystaryn oryndap, mańaıyn abattandyrý josparlanyp otyr. Bul jumystar bizge jetken eskertkishtiń tarıhı beınesin barynsha saqtap qalýǵa baǵyttalǵan. Bolashaqta Saraıshyq qazaqstandyq memlekettik jáne halyqaralyq týrıstik marshrýttar júıesine qosylyp, damyp kele jatqan týrıstik ınfraqurylymynyń erekshe toraby bolatyny sózsiz» dep jazylǵan habarlamada.
