Eldegi Ulttyq statıstıka departamenti Ulybrıtanııaǵa jumys isteý maqsatymen kelgen adamdardyń áli de kóp ekenin aıtyp otyr. Máselen 2017 jyly 220 myń eýropalyq azamat «Tumandy Albıonda» turýǵa sheshim qabyldaǵan eken. Áıtse de Breksıt bastalǵaly beri otanyna oralǵan eýropalyq azamattar jeterlik. Byltyr olardyń sany 130 myńǵa jetken. Iаǵnı kóshi-qonnyń aıyrmashylyǵy 90 myń adamdy qurap otyr. Ulybrıtanııada mıgrasııanyń deńgeıi buryn-sońdy júz myńnan tómen túsip kórmegen-tuǵyn.
Sonymen qatar Anglııany tastap ketken aǵylshyndardyń sany da artqan. Byltyr 125 myńǵa jýyq ulybrıtanııalyq azamat basqa elge qonys aýdarǵan eken. Otanyna qaıta oralǵan aǵylshyndar nebári 73 myńdy quraǵan.
«EO azamattaryna Ulybrıtanııadan ketýge Breksıt áser etýi múmkin. Alaıda adamdardyń sheshimi óte kúrdeli bolǵandyqtan, oǵan sebep kóp bolýy yqtımal», deıdi Ulttyq statıstıka departamentiniń ókili Nıkola Ýaıt Euronews-ke bergen suhbatynda.
Iran AQSh-qa eskertý jasady
Iran tarapy ıadrolyq qarýǵa qatysty 2015 jylǵy kelisim oryndalmasa, ony ıgerýin qaıta qolǵa alatynyn málimdedi. Londonda ótken Chatham house kezdesýinde Syrtqy ister mınıstriniń orynbasary Abbas Aragchı AQSh prezıdenti Donald Tramp ustanǵan saıasat dúdámal jaǵdaı týyndatyp otyrǵanyn aıtty.
«Eger kelisimdi buzsaq, taǵy bir ıadrolyq daǵdarys týyndaýy yqtımal. Ony sheshý kóp ýaqyt alatyny anyq. Bul – álemdik deńgeıdegi qaýipsizdik pen qater tóńiregindegi tańdaý. Sanksııanyń alynyp tastalýynan Iran tarapy paıda kórýi tıis bolatyn. Alaıda bankter men kompanııalar bizben jumys istemese, onyń eshqandaı tıimdiligi joq», dedi A.Aragchı.
«Eýropalyq odaq, álemdik negizgi kúshke ıe alty memleket jáne Iran arasyndaǵy Vena kelisimine saı, Tegeran bıligi ýrandy baıytý baǵdarlamasyn toqtatýy tıis bolatyn. BUU baqylaýshylary eldiń ózine qoıylǵan talapty oryndap otyrǵanyn anyqtady. О́z kezeginde Iranǵa salynǵan sanksııa alynyp, munaı men gaz satýǵa múmkindik aldy», deıdi Al Jazeera.
Reseı BUU qararyna veto qoıdy
BUU Bas hatshysynyń Tótenshe jaǵdaılar jónindegi kómekshisi Mark Lokok Sırııadaǵy Shyǵys Gýtadaǵy jaǵdaıǵa alańdaýshylyq bildirip, aımaqta oq atýdy toqtatý týraly Qaýipsizdik Keńesine qarar qabyldaýǵa shaqyrǵan bolatyn. Alaıda daýys berý kezinde Reseı tarapy oǵan veto qoıdy.
Qaýipsizdik Keńesiniń Sırııa ǵa qatysty kezekten tys otyrysynda baıandama jasaǵan M.Lokok sońǵy táýlikte 50 turǵyn qaza taýyp, 200-ge jýyǵy jaralanǵanyn jetkizdi. Onyń aıtýynsha, qorshaýda qalǵan Sırııa halqyna gýmanıtarlyq kómek kórsetý qıyndap ketken. Osynyń saldarynan keıingi úsh aıda 22 myń adamǵa ǵana qol ushyn sozý múmkin bolǵan. Byltyr aı saıyn 175 myńǵa jýyq adam turaqty túrde gýmanıtarlyq kómek alyp turǵan edi.
«Reseı Shyǵys Gýtada 30 kúndik oq atpaý jáne gýmanıtarlyq kómek jetkizý jónindegi qararyn qabyldamaı tastady. Taraptyń paıymdaýynsha, Sırııa astanasy Damaskiniń mańyndaǵy beıbit turǵyndardyń jappaı qyrylýy jónindegi aqparat shyndyqqa janaspaıdy eken. Reseı ókili Vasılıı Nebenzıa Shvesııa men Kýveıt tarapynyń atysty doǵarý jónindegi usynysy múmkin emestigin málimdedi», deıdi BBC.
V.Nebenzıanyń sózine qaraǵanda, Shyǵys Gýtadaǵy basbuzarlar qarapaıym turǵyndardy kepilge alyp, qarýly bekinisterin aýrýhanalar men mektepterge ornalastyrǵan kórinedi. Sonymen qatar aımaqtaǵy qyrǵyn týraly málimetter aqparattyq soǵystyń kánigi tásili ekenin atap ótip, oǵan sene berýge bolmaıtynyn jetkizdi.
Sholýdy ázirlegen
Abaı ASANKELDIULY,
«Egemen Qazaqstan»
