Bastan aıaq aǵylshyn tilinde ótken sharany Batys Qazaqstan oblysy ákiminiń orynbasary, «Bolashaq» baǵdarlamasynyń túlegi Ǵabıdolla Ospanqulov júrgizdi. Pikir alańyna negizgi spıker retinde qatysqan Italııanyń Pıza qalasyndaǵy SantAnna ýnıversıtetiniń rektory Perrata Perdomınıko, «Valagro Dıjı grýpp» kompanııasy bas dırektory Ottorıno La Rokka, «Dı Djı Impıantı (DG Impianti)» kompanııasy bas dırektory Palosso Ýılıam men bas atqarýshy dırektory Mıkele Anjelo Tortorella, «Italfluid – DG group» bas dırektory Galletta Antonıno, «Kaspıan Prodjer» kompanııasynyń bas dırektory Krıshı NıGaetano sóz sóılep, elimizdiń bilim salasyndaǵy oń ózgeristerge rızashylyq bildirdi.
Italııandyqtar Oral qalasynda tek júrgen joq. «Kaspıan Prodjer» kompanııasynyń bas dırektory Krıshı Nıno Gaetano osydan birneshe jyl buryn Oraldaǵy Jáńgir han atyndaǵy Batys Qazaqstan agrarlyq-tehnıkalyq ýnıversıteti janynan «Arman zerthanasy» («Laboratorııa Mechta») atty stýdenttik úıirme quryp, tehnıkalyq sala stýdentteri men magıstranttaryn qazirgi zamanǵy óndiris oryndarynda tájirıbeden ótkizý jumysyn bastaǵan. Bul joly da ıtalıandyq qonaqtar Qazaqstanǵa, sonyń ishinde jergilikti Jáńgir han atyndaǵy Batys Qazaqstan agrarlyq-tehnıkalyq ýnıversıtetinde zerthana ashý maqsatynda ınvestısııa bólip, kóptegen birlesken jobalardy júzege asyrmaq.
Meımandar Qazaqstanda qolǵa alynǵan Rýhanı jańǵyrý baǵdarlamasynan da habardar bolyp shyqty. Máselen, ıtalıandyq delegasııa jetekshisi Perrata Perdomınıko baǵdarlamada aıtylǵan alty prınsıptiń biri – Bilimniń saltanat qurýynyń mańyzdylyǵyna erekshe toqtalyp, Qazaqstannyń durys damý baǵytynda ekenin atap kórsetti. Al Ottorıno La Rokka Qazaqstanǵa alǵash aıaq basqan 2001 jyldy eske alyp, sodan beri elimizde bilim salasynda oń ózgeris kóp bolǵanyn aıtty. «Qazir júzege asyp jatqan Rýhanı Jańǵyrý baǵdarlamasy adamı kapıtal sapasyn arttyrýǵa oń septigin tıgizerine senim bildiremin» dedi sheteldik meıman.
Italıandyq ǵalymdarmen bolǵan kezdesýge Oral qalasy JOO-larynda bilim alyp júrgen bolashaq ınjenerler, Nazarbaev zııatkerlik mektebiniń oqýshylary qatysty.
Qazbek QUTTYMURATULY,
«Egemen Qazaqstan»
