Assambleıanyń HHII sessııasynyń ashylý saltanatyndaǵy sózinde Memleket basshysy qıyn-qystaý zamanda elimizge kóptegen halyqtardyń jer aýdarylǵanyn, sol kezeńde jergilikti jurttyń olarǵa úlken qamqorlyq kórsetkenin, eldiń jaǵdaıy aýyr bolsa da, baryn bólisip, tatý-tátti tirlik etkenin eske aldy. «Stalın rejiminde ár jyldary, ózderińiz biletindeı, halyqtar túgeldeı jer aýdaryldy. Olardy vagondardan aýyldarǵa tastap kete berdi, olardyń esh dúnıesi bolǵan joq. Sol ýaqytta bul dalada ózderi muqtaj bola otyryp, olardy saman úılerine qabyldaǵan qazaqtar, qazaq otbasylary ǵana ómir súrdi», dedi Elbasy. Nursultan Nazarbaevtyń osy sózderi «Alǵys aıtý kúni» merekesiniń basty fılosofııalyq irgetasy boldy.
Bul kúnde barlyq ulttyń bir-birine jáne osy adamdardy qabyldaǵan, barynsha qamqorlyq bildirgen qazaqtarǵa alǵys aıtýy tamasha dástúrge aınaldy. Alǵys aıtý kúnniń halyqaralyq dárejesi joq, biraq elimiz úshin bul úlken asa mańyzdy merekelerdiń biri. 1 naýryz – Elbasynyń beıbitshilik pen kelisimge negizdelgen sarabdal saıasatynyń nátıjesi pash etiletin kún. Uly Dala eliniń jastary úshin birtutas eldiktiń, yntymaqtastyq pen tatýlyqtyń jáne de ótkenge salaýat pen bolashaqqa degen úmittiń merekesi.
Aldaǵy ýaqytta Elbasy bastaǵan Qazaqstan halqy Assambleıasy jastar saıasatyn jańartýdy josparlaýda. Saıası, ekonomıkalyq, rýhanı jańǵyrýdyń aıasynda QHA jastar qanatyn reformalandyrý da kókeıkesti másele. Búgingi býyn bir shańyraqtyń astynda, birtutas ult retinde qazaqtyń eline, jerine, tiline qurmet bildire júrip, Uly Dala eliniń damýyna úles qosýǵa daıyn.
Maksım SPOTKAI,
Qazaqstan halqy Assambleıasynyń múshesi, «Nur Otan» partııasy medıa-redaksııasynyń basshysy
