Jastarǵa tikeleı qatysy bar turǵyn úı qoljetimdiligi, joǵary bilim sapasynyń artýy men shaǵyn jáne orta kásipkerlikti damytýǵa arnalǵan usynystar memlekettik saıası sheshimderdiń úlken bóligi jastarǵa baǵyttalǵanyn kórsetedi. Bizge berilgen jeńildikter men múmkindikter – jastarǵa artylǵan jaýapkershiliktiń artqanynyń da kórsetkishi.
Alǵashqy joba Qazaqstannyń kez kelgen turǵynynyń kókeıinde júrgen suraqqa dóp túskenine senimdimin. Turǵyn úı elimizdegi, ásirese, Astana men Almaty qalalarynyń turǵyndary úshin óte ózekti másele. «7 – 20 – 25» baǵdarlamasy barsha qazaqstandyqtardyń, ásirese, jas otbasylardyń qysqa merzimde turǵyn úı baǵasynyń besten bir bóligin jınap, tómen paıyzdyq mólsherlememen baspanaly bolýlaryna múmkindik beredi. Álemniń damyǵan elderiniń, megapolıs qalalardyń tájirıbesine qarasaq, olarda turǵyn úı máselesi sheshimin áli kúnge deıin tappaı keledi. Ipotekaǵa baspana alý – álemdik tájirıbe, al memlekettiń paryzy – azamattaryna utymdy shartta nesıe usyný.
Al joǵary oqý sapasynyń artýy men stýdentterdiń áleýmettik jaǵdaıynyń jaqsarýy bilimdi jáne básekege qabiletti mamandardy daıarlaýda óz jemisin bereri sózsiz. Qosymsha beriletin 20 myń grant sany elimizdegi aldaǵy jyly mektep bitirýshilerdiń tegin oqýǵa qol jetkizý múmkindikterin eseleı túspek. Qosymsha granttar sany túlekterdiń ózge eldiń joǵary oqý oryndaryna basymdyq berýin azaıtýdyń sheshimine aınalýy tıis. Ásirese Reseımen shekaralas ornalasqan aımaq oqýshylary arasynda reseılik joǵary oqý oryndaryn tańdaý tendensııasy baıqalady. Bul bastama sapaly mamandardyń elimizde daıyndalyp, osynda qalýyna septigin tıgizýi kerek.
Sonymen qatar shaǵyn jáne orta kásipkerlikti damytýǵa beriletin mıkrokredıtter mólsheri 20 mlrd teńgege artýy da jastarǵa tıimdi dep esepteımin. Bul jastar arasyndaǵy jumyssyzdyq máselesin sheshýge de áser etpek. Jumyssyzdyq sebebinen oryn alatyn túrli quqyq buzýshylyq áreketterdiń de azaıýyna alyp keledi degen oıdamyn.
Elbasy osy bastamalardy qadaǵalaýdy «Nur Otan» partııasyna tabystady, al oǵan partııanyń jastar qanaty retinde «Jas Otan» tikeleı qatysady.
Danııar SÚNDETBAEV,
«Nur Otan» partııasy «Jas Otan» jastar qanatynyń tóraǵasy
