О́ńirde qarǵyn sýdyń beti azdap bolsyn qaıta bastaǵandaı. Oblystyq Tótenshe jaǵdaılar departamenti baspasóz qyzmetiniń búgingi tańǵy 8-degi usynǵan málimetterine qarap osyndaı oı túıýge bolatyn sııaqty. Departamenttiń baspasóz qyzmetiniń taratqan sońǵy derekterine súıensek, oblysta 136 úıden sý ketipti, ázirge 6 jeke úı qarǵyn sýdyń qorshaýynda tur. Esterińizge sala keteıik, aımaqta qalyptasqan kúrdeli jaǵdaıǵa baılanysty 140 jeke úı, 180 aýla aýmaǵy men 110 saıajaı aýmaǵyndaǵy úılerdi sý basqan edi.
Qazirgi ýaqytta sýdy sorý jumystary qarqyndy túrde júrgizilýde. Osy ýaqytqa deıin úıler men aýla aýmaqtarynan 34 myń tekshe metr sý sorylypty.
Aıagózdegi jaǵdaı da qalypqa kele bastaǵan sekildi. Aıagóz qalasynda 260 turǵyn óz úılerine oralypty. Oqıǵa ornynda aýdandyq tótenshe jaǵdaı bólimi men Shyǵys óńirlik aeroutqyr qutqarý jasaǵy ókilderiniń jasaqtary sý bógetterin bekitý jumystaryn qolǵa alyp jatqan kórinedi. Al qutqarýshylar eldi mekendi táýlik boıy kúzetýde.
Departamenttiń órt sóndirý bóliminiń qyzmetkerleri О́skemende de tynym tappaı, kún-tún demeı sýdy sorý jáne aýlalardaǵy qar tazalaý jumystarymen shuǵyldanýda. Úılerinen ýaqytsha kóshirilgen 15 adam áli óz baspanalaryna oralmaǵan. Týystarynyń úıin panalaýda. Qalada azamattardy ornalastyrý úshin «Úlbi» halyqqa qyzmet kórsetý áleýmettik ortalyǵynan oryn ázirlenipti.
Kúrshim aýdanynda qutqarýshylar turǵyndardy bir jaǵadan ekinshi jaǵaǵa ótkizý jumystaryn jalǵastyrýda. Táýlik boıy kezekshilik qoıylǵan. Oblys boıynsha 50 jylqy, 125 iri qara men 484 qoı-eshki qaýipsiz jerlerge jetkizilipti.
Sońǵy málimetterge súıensek, apattyq qutqarý jumystaryna Ishki ister, Tótenshe jaǵdaılar departamenti men jergilikti atqarýshy organ ókilderin qosa alǵanda 708 adam, 204 tehnıka men 27 sý sorý qurylǵysy jumyldyrylypty.
Azamat QASYM,
«Egemen Qazaqstan»
Shyǵys Qazaqstan oblysy
