«Muqashev Serikjan Shaızadauly QR QK 367-baby, 3-bóliginiń 1, 2-tarmaqtarynda kózdelgen qylmysty jasaý boıynsha aıypty dep tanylyp, oǵan úsh jylǵa deıin bas bostandyǵynan aıyrý, ómir boıy memlekettik qyzmette laýazym ıelený quqyǵynan aıyrý jazasy belgilensin, jazany qylmystyq-atqarý júıesiniń qaýipsizdik deńgeıi ortasha mekemesinde ótesin», - dep úkim oqydy sýdıa Ýbaıdýlla Qoshanov.
Istiń basqa qatysýshylaryna da jaza belgilendi. Muqashevtyń orynbasary Shámishevke memlekettik qyzmette laýazym ıelený quqyǵynan ómir boıyna aıyra otyryp, 2 jylǵa bas bostandyǵynan aıyrý jazasy berildi. «Qazaqavtojol» RMK basqarmasynyń burynǵy bastyǵy Elemesovtiń bas bostandyǵy bes jylǵa shekteldi. «Qazaqavtojol» RMK memlekettik satyp alýlar basqarmasynyń burynǵy bastyǵy Ájiǵulov pen «Qazaqavtojol» RMK Qaraǵandy oblystyq fılıalynyń burynǵy dırektory Muqanov eki jylǵa bas bostandyǵynan aıyryldy.
Eske sala keteıik, byltyr 20 jeltoqsanda Sybaılas jemqorlyqqa qarsy is-qımyl ulttyq bıýrosynyń baspasóz qyzmeti Respýblıkalyq bıýdjettiń atqarylýyn baqylaý jónindegi esep komıtetiniń bas memlekettik aýdıtorlary B. Kópebaeva men A. Jáńgirova iri mólsherde para alǵanyn málim etken bolatyn. Laýazymdy tulǵalar josparly tekseris júrgizý kezinde «Qazaqavtojol» RMK bas dırektory S. Muqashev pen onyń orynbasary E. Shámishevten bıýdjet qarajattaryn orynsyz paıdalanǵanyn aýdıtorlyq esepte kórsetpeýi úshin 16 mıllıon teńge mólsherinde para alǵan. Osy qylmystyq iske «Qazaqavtojoldyń» oblystyq fılıaldarynyń barlyq basshylary tartylyp, memlekettik aýdıtorlar úshin paraǵa aqsha jınaǵan.
