Kezekten tys konferensııa barysynda eki másele qaraldy. Atap aıtqanda, Jeńil atletıka federasııasyn buǵan deıin basqarǵan Ádilbek Jaqsybekovtiń ókilettiligin merziminen buryn toqtatý jáne federasııanyń jańa prezıdentin saılaý.
Atqarý komıteti músheleriniń biraýyzdy sheshimimen Ádilbek Jaqsybekovtiń ókilettiligi merziminen buryn toqtatylyp, onyń ornyna QR jeńil atletıka federasııasynyń prezıdenti bolyp Ahmetov Danıal Kenjetaıuly saılandy.
«Maǵan senim bildirgenderińizge rahmet! Ádilbek Ryskelduly basqarǵan bir jyldyń ishinde az sharýa atqarylǵan joq. Endi sol bastamalardy ary qaraı jalǵastyryp, Qazaqstan jeńil atletıka federasııasyn damytýǵa tyrysamyz. Aldymyzǵa qoıǵan maqsattarymyz óte kóp. Máselen, birinshi rette, sporttyq ınfraqurylymdardy jetildirýdi kózdeımiz. Jaqyn ýaqytta jeńil atletıkaǵa beıimi bar barlyq óńirlerdiń ákimderimen kezdesip, sol aımaqtardyń jeńil atletıka sportyn damytý joldaryn qarastyramyz. Sonyń ishinde, kelesi jyly Semeı qalasynda Ulttyq quramalar bazasy daıyn bolady», - dedi Danıal Ahmetov.
Sondaı-aq shara barysynda Jeńil atletıka federasııasy Atqarý komıtetiniń jańa músheleri bekitilip, Ádilbek Jaqsybekov Atqarý komıtetiniń quramyna endi.
