Temirlan Baıtemir, Aıshat Baqytova, Aıdos Áýbákirov, Arman Serikov, Baıaz Merýert, Nurǵısa, Qarataı Nurbol, Ásemgúl Toqbaeva Ásemgúl, Toqsanbaı Arystan, Ilııas Qýandyqov, Karına Sabyrjanova, Ánel Jarqumbaeva, Ánel Saıdaǵalı, Darıǵa Sahıeva, Hýmyrzahuly Isa, Albına Kóshimhan, Aıman Ilıasova, Saıa Jeńis sııaqty 30-ǵa jýyq oqýshylar qatysty. Kúıshi-dombyrashylardyń ónerin baǵalaýǵa ádil-qazylar alqasy bolyp blys ortalyǵyndaǵy mýzykalyq kolledjdiń halyq aspaptar bóliminiń meńgerýshisi–Ryskúl Asaýbaıqyzy, Isa Baızaqov atyndaǵy fılormonııanyń ánshisi Baýyrjan Ahmetov, Daryndy balalarǵa arnalǵan mýzykalyq mektep-ınternaty qobyz ben jetigen synybynyń muǵalimi Maqpal Saǵymbaıqyzy tórelik jasady.
Aldymen kúı tartys erejesi boıynsha, qazylar alqasy kúıshilerdi jeke-jeke tyńdap aldy. Ryskúl Saǵymbaıqyzynyń aıtýynsha, jas dombyrashylardyń kúı tartystaǵy ónerlerine beriletin baǵa: oryndaý sheberligi, ártistiligi, eki qoldyń qoıylymy, sahnalyq kıimi men oryndaýshynyń sahna beınesi qarap baǵalynypty. Kelesi kezekte kúıshiler jekpe-jek kezdesip, kúı tartys ta bastaldy. Kúıshiler Qurmanǵazynyń «Balbyraýyn», «Adaı», Dáýletkereıdiń «Túrkimen», R. Jeldibaevtiń «Erke sylqym», Dınanyń «Toı bastar», Halyq kúıi «Kelinshek» sııaqty tókpe kúılerdi, kelesi kezeńde ataqty Súgirdiń, Táttimbet atalarynyń, Tólegen Mombekov, Qarshyǵa Ahmedııarov, Seken Turysbekovtyń shyǵarmalary shertpe kúılerdi oryndap berdi.
Kópshiligi ultymyzdyń salt-dástúrin, án-kúıin ulyqtaǵan elge oralǵan oralman otbasylarynyń ul-qyzdary. Atadan balaǵa mıras kúıshilik, dombyranyń óner ǵumyry soltústik óńirde de jańǵyryp jalǵasýda. Jahandaný zamany aınalany qansha qorshap, shyrmap alsa da kishkentaılarynan qoldaryna dombyra ustap, ulttyq ónerdiń umytylmaýy úshin kúı úırenip, mýzykalyq mektepterge baryp, oqyp júrgen ul-qyzdarǵa rıza bolyp, qyzyǵa qaraısyń da.
Sóıtip, kúı tartys baıqaýynyń bas júldesi oblys ortalyǵyndaǵy Qurmanǵazy atyndaǵy №1 balalar mýzyka mektebiniń oqýshysy Aıshat Baqytovaǵa berildi.
- Bul jeńisimdi ustazym Qýanysh Meıramulyna arnaımyn. Kúı tartysta Tólegen Mombekovtyń «Saltanat» kúıin oryndadym,-deıdi Aıshat.
Al, 1-shi orynǵa Ekibastuzdaǵy balalar mýzyka mektebiniń oqýshysy Arman Serikov, 2-shi oryndy Qarshyǵa Ahmedııarovtyń «Jibek jetisý» kúıin oryndaǵan oblys ortalyǵyndaǵy №2 mektebiniń oqýshysy Aıdos Áýbákirov pen Seken Turysbekovtyń «Kóńil tolqyny» kúıin oryndaǵan №35 mekteptiń oqýshysy Darıǵa Sahıeva ıelense, 3-shi oryndy Ertis aýdany balalar óner mektebiniń oqýshysy Aıman Ilııashva men Oqýshylar saraıynyń «Jas Ekpin» dombyra ansambliniń múshesi Ásemgúl Toqbaevalar aldy.
Oqýshylar saraıynda eki kún boıy Qurmanǵazynyń «Balbyraýyn», «Adaı», «Saryarqa», Dáýletkereıdiń «Túrkimen», R. Jeldibaevtiń «Erke sylqym», Dınanyń «Toı bastar» kúıleri oryndaldy. Kúı tartystyń qyzyǵyn kórýge jınalǵan kórermen toly zal kúmbirlegen dombyra únin tyńdap, rýhanı bir demalǵandaı. Sahnada- oblystyń aýyl, qalalarynan jınalǵan mektep oqýshylary kúıshilik, kúı tartý ónerlerimen tańqaldyrdy.
Farıda Byqaı
«Egemen Qazaqstan»
Sýretti túsirgen Ásem Aıyp
