Aımaq basshysy Q.Kósherbaev ekiqabatty ǵımarat bloktarynyń arasyndaǵy ótkel qulaǵan kópqabatty úı turǵyndarymen kezdesti.
Oblystyq bıýdjetten Kishi Aral kóshesiniń boıynan 31 jeke úıdiń qurylysyna qarjy bólinip, ol Aral qalasyndaǵy apattyq jaǵdaıdaǵy úıdiń turǵyndary men bıýdjettik sala qyzmetkerlerine beriledi dep habarlady oblys ákimi.
«Sizderdiń jaǵdaılaryńyzdy bilip,barlyq jaǵdaı jasalǵanyna kóz jetkizgim keldi. Apatty ǵımarat buzylady. Sizderge Kishi Aral kóshesinen 31 jańa jeke úıler beriledi.Biz kópqabatty úı emes, jeke úıler salýdy jón kórdik. Osyndaı shara qoldaný arqyly Aral qalasyndaǵy apatty turǵyn úı máselesi tolyqtaı sheshiledi»,-dedi oblys ákimi.
Odan buryn 18 naýryzda Aral qalasynyń ákimi Baýyrjan Mahatov О́ńirlik Kommýnıkasııalar qyzmetinde ótken brıfıngte qazirgi tańda Aral qalasynda 8 otbasy turatyn taǵy bir apatty úıdiń bar ekenin aıtty. Tótenshe jaǵdaı oryn alǵan úıde 16 otbasy turǵan.Olaı bolǵanda, jańa 31 jeke úıdi apatty úıdegi 24 otbasy men bıýdjettik sala qyzmetkerleri alatyn bolady.
Esterińizge sala keteıik, 2018 jyldyń 17 naýryzy kúni Aral qalasynda ekiqabatty ǵımarattyń bloktary arasyndaǵy ótkel qulaǵan bolatyn. «Jarokov kóshesi,20» mekenjaıy boıynsha ornalasqan ǵımarat 1986 jyly balabaqsha retinde salynǵan. Al,90 jyldary baspanasy joq aýdan turǵyndary munda zańsyz ornalasqan. Ekiqabatty úıde 20 páter bolsa, onyń 15-de adam turǵan. Turǵyndar birden aýdandyq Jastar resýrstyq ortalyǵyna jáne týǵan-týysqandarynyń úılerine ornalastyryldy. Búginde aýdan basshylyǵy tapsyrmasymen turǵyndardy ýaqytsha turǵyn úımen qamtý sharalaryn qabyldap, jumys jasaýda.
