Sýretti túsirgen Erlan Omar
«Baspasózge kirispe» taqyrybynda ótken jobanyń alǵashqy sabaǵyna L.N.Gýmılev atyndaǵy Eýrazııa ulttyq ýnıversıteti Jýrnalıstıka jáne saıasattaný fakýltetiniń 40-qa jýyq stýdenti kelip qatysty. Áleýmettik jeli qoldanýshylary da sabaqty onlaın tyńdaýǵa múmkindik aldy.
Dáristi júrgizgen bas basylym basshysy, «Egemen akademııasy» jobasynyń avtory Darhan Qydyráli bul jobanyń basqa medıa trenıngterden aıyrmashylyǵy – ǵasyrǵa jýyq qalyptasqan mektebi bar, ulaǵatty ustahana sanalatyn «Egemen Qazaqstannyń» tájirıbesimen bólisý, dáristi uzaq ýaqyt úzbeı júrgizý jáne jastardy jazýǵa mashyqtandyrý arqyly baspahanadaǵy óndiriske aralastyrý ekenin aıtty. Álemdik baspasózdiń tarıhyna sholý jasaǵan dárisker onyń balama medıamen baılanysy jáne bolashaǵy jaıly sóz etti. Sondaı-aq qazirgi medıa trendterge, jarnamanyń róli men jýrnalıstik etıka taqyrybyna da toqtaldy.
«Egemen akademııasynyń» ashylýynda sóz alǵan joba úılestirýshisi Darhan О́mirbek sharanyń maqsattary men mindetterin atap ótti. «Gazet ómiri úlken konveıer ekeni belgili. Gazet ómiriniń ereksheligine baılanysty shyǵarmashylyq ujymnyń bos ýaqyttary joq. Olar jıyndarǵa bara bermeıdi, minberlerden sóılemeıdi, qoǵamdyq dáristerge qatyspaıdy. Biraq olardyń mol tájirıbesi bar. Biz sol tájirıbemen bólisýdi gazetimizdiń mıssııasy sanaımyz», dedi ol.
Sabaqqa jınalǵan jastar da belsendilik tanytyp, spıkerge óz saýaldaryn qoıdy. Jańa jobanyń artyqshylyqtary jaıly pikirlerin bildirdi.
«Ýnıversıtette alǵan teorııalyq bilimimizdi toppen birge kelip, redaksııanyń ózinde tájirıbe arqyly júzege asyrý múmkindigine ıe bolǵanyma óte qýanyshtymyn. Bul elimizdegi eń úzdik gazettiń, eń úlken redaksııanyń bolashaq jýrnalıster úshin jasap otyrǵan janashyr jobasy dep esepteımin. Stýdentterge gazet shyǵatyn qaınaǵan ortany kórý tamasha oraı dep oılaımyn», deıdi III kýrs stýdenti Aıman Talǵat.
Júz jylǵa jýyq tarıhy bar basylymdaǵy tájirıbeni jas jýrnalıstermen bólisip, aqparat salasyna bilikti mamandar daıyndaýǵa úles qosýdy kózdegen jobada ár kýrs úsh aı ýaqytty qamtıdy. Aptasyna bir ret bolatyn dáristi basylym qyzmetkerlerinen bólek arnaıy spıkerler de júrgizedi. Stýdentter bilikti mamandardyń dárisin tyńdaı otyryp, maqala jazý, hat qorytýdan bastap, basylymnyń baspahanadan shyǵýyna deıingi prosesimen jan-jaqty tanysady. Sabaqtar boıynsha tanymdyq maqala, esse jáne saraptamalyq materıal jazǵan belsendi qatysýshylarǵa kýrs aıaqtalǵan kezde arnaıy sertıfıkattar tabystalady. Alǵashqy maýsymda taqyryp tańdaý, taqyryp qoıý, zertteý maqalasyn jazý, saraptamalyq maqala jazý, mátindi óńdeý, suhbat alý, fotojýrnalıstıka, betteý sekildi taqyryptar qamtylady.
Maıgúl SULTAN,
Sýretti túsirgen Erlan Omar
«Egemen Qazaqstan»
