Táýelsizdik alǵanymyzǵa otyz jylǵa jýyq ýaqyt ótse de ana tilimizdiń búgingi keıpi áli kúnge deıin bosaǵadan syǵalap, tórge oza almaı turǵan múshkil halin kózge elestetedi. Oǵan mysaldardy ondap, júzdep keltirýge bolady. Jıyrmasynshy shaǵyn aýdanda ornalasqan záýlim saýda nysandarynyń «azan shaqyryp» qoıǵan attary – «Korona», «Sýlpak», «Aport», «Semeınyı»... osylaı jalǵasyp kete beredi. Tipti Petropavl qalasyn sheteldiń shaharlarymen shatastyryp alý op-ońaı. Árıne ádemiligi, sándiligi jaǵynan emes. Til múkistigi, ulttyq reńk boıynsha! Byltyr osy mańaıda «Mega» saýda, oıyn-saýyq ortalyǵy boı kóterdi. Mańdaıshalarǵa jazylǵan, qaǵylǵan ataýlar qandaı deseńshi: «Detskıı mır», «Elektronıka», «Mechta», «Cinema park», «City mall», «Magnum Atak», «Radýjnyı»...Birde-bir qazaqsha at emge tabylmaıdy.
Jergilikti aıaqdop sheberleri óner kórsetetin fýtbol komandasy «Qyzyl-Jar SK» dep atalady. Durysy «Qyzyljar SQ» ǵoı dep jankúıerler qudaıdyń zaryn aıtyp, qansha qaqsasa da «baıaǵy jartas – bir jartastyń» kebimen melshıgen qalpy tur. Qonaqúı ataýy «Qyzyl Jar»!? Petropavl araq-sharap zaýytynyń brendine aınalǵan «Qyzyl-Jar» alkogoldi ishimdigin «aqańa» yqylyq ata toıyp alǵan «bir myrza» jaza salǵandaı áser qaldyrady. Bir uǵymdy ańǵartatyn jer ataýynyń qalaı jazylatynyn bilý sonshalyqty qıyn ba?
Buryndary jańa qurylymdarǵa ataý berilgende qazaq tili erejesiniń saqtalýy ejikteı tekseriletin. Sońǵy kezderi osy qatań jaýapkershilik báseńsigen bilem, Til týraly zań talaptaryna júrdim-bardym qaraýshylar jaýynnan keıingi sańyraýqulaqtaı kóbeıip barady. Jarǵylyq qujattardy tirkeýden ótkizetin ádilet basqarmasy mamandarynyń máseleniń baıybyna tereńdep barmaýyna qaraǵanda quryltaıshylardyń ótinish-tilekterin qanaǵattandyrýmen ǵana shekteletin sııaqty. Mundaı kózqaraspen tilimizdiń kósegesi kógermesi anyq. Bul jerde «kim qalaı ataǵysy kelse erki, quqy» degen ýáj júrmeýi tıis. Dál osyndaı kózqarasty ustansaq, ataýlardyń múldem shubarlanyp ketpesine, jazbaq túgil aıtýǵa uıalatyn, namysqa tıetin ataýlardyń jarnamalanbasyna kim kepil?
О́mir ESQALI,
«Egemen Qazaqstan»
Soltústik Qazaqstan oblysy
