Oblystyq kásipkerler palatasynyń baspasóz qyzmeti taratqan aqparatta qaýymdastyqtyń negizgi maqsaty - qaýymdastyq músheleriniń múddesin tanytý jáne qorǵaý ekendigi aıtylady.
- Osy ýaqytqa deıin balyq sharýashylyǵymen aınalysatyn kásipkerler máselelerin árqaısysy óz betinshe sheship keldi. Sebebi, bastaryn biriktiretin arnaıy uıym bolmady. Sol sebepti bul azamattardyń problemalaryn sheshýde qıyndyqtar boldy. Qurylǵan qaýymdastyq aldaǵy ýaqytta atalmysh saladaǵy júıeli máselelerdi jedel ári sapaly sheshýge múmkindik beredi degen senimdemiz, - dedi oblystyq kásipkerler palatasynyń sarapshysy Alma Pirmanova.
Oblystyq kásipkerler palatasy balyq sharýashylyǵyna baılanysty túrli is-sharalar uıymdastyryp keledi. Bıyl aqpan-naýryz aılarynda birneshe ret «Balyq sharýashylyǵyn damytýdyń problemalary men múmkindikteri» taqyrybynda teorııalyq semınar-trenıngter ótkizdi. Semınar-trenıngte balyq sharýashylyǵy nysandarynyń túrlerimen tanystyrý, kóldik-taýarly balyq sharýashylyǵynyń erekshelikteri, balyq ósirý, tamaqtandyrý, kútim jasaý joldary jáne oblysta osy salany damytý múmkinshilikterine qatysty máseleler talqylandy.
Baqtııar TAIJAN,
«Egemen Qazaqstan»
