Ulttyq ekonomıka mınıstri Tımýr Súleımenov pen qarjy mınıstri Baqyt Sultanov 2018 jylǵa arnalǵan negizgi makro kórsetkishter men bıýdjet parametrleri týraly baıandama jasady.
Ulttyq ekonomıka mınıstri Tımýr Súleımenov 2017 jyly ataýly JIО́ 52,4 trln teńge deńgeıinde baǵalanǵanyn atap ótti. Ol 558 mlrd teńgege ulǵaıǵan. Naqty ósim 4% quraǵan. 2018 jylǵy qańtar-aqpanda ekonomıkanyń ósimi 4% qurady.
2018 jyly munaıdyń boljamdy baǵasy bir barreline $45-dan $55 deıin ulǵaıdy. Metalldardyń baǵa ındeksi 0,4% artty.
«2017 jylǵy naqtylanǵan bazany esepke ala otyryp, 2018 jyly ataýly JIО́ 57,2 trln teńge kóleminde boljanady. Bul tamyzda maquldanǵan kórsetkishten 1,3 trln teńgege artyq. Naqty JIО́ 3,8% deńgeıinde kútilýde (esk. – buǵan deıin 3,1% boljandy). Jan basyna shaqqandaǵy JIО́ $9 200 deıin ulǵaıady», — dedi ulttyq ekonomıka mınıstri Tımýr Súleımenov.
Budan ózge, ónerkásiptiń ósýi 3,3% deıin artýymen qaıta qarastyryldy. Bul óńdeý ónerkásibiniń kútiletin asa joǵary ósimimen — 5,1% baılanysty.
Sondaı-aq, Energetıka mınıstrliginiń boljamdary boıynsha 2018 jyly munaı óndirý kólemi 87 mln tonnany quraıdy. Munaıdyń álemdik baǵalarynyń ulǵaıýyn jáne ekonomıkanyń ósimin eskere otyryp, eksport $54 mlrd deıin, al ımport $34 mlrd deıin artady.
Inflıasııa buǵan deıin bekitilgen 5–7% dálizinde saqtalady.
Túzetilgen makroboljam negizinde 2018 jylǵa arnalǵan respýblıkalyq bıýdjet parametrleriniń boljamy naqtylandy.
«Kirister (transfertterdi esepke almaǵanda) 2018 jyly 5,7 trln teńge kóleminde baǵalanady. Bul bekitilgen josparǵa qaraǵanda 190 mlrd teńgege joǵary. Ulttyq qorǵa túsimder boljam boıynsha 546 mlrd teńgege ulǵaıyp jáne 2,6 trln teńgeni quraıdy», — dedi Tımýr Súleımenov.
Jyl sońyna Ulttyq qordyń valıýtalyq aktıvteri $58,3 mlrd kóleminde boljanyp otyr. Bul JIО́-ge qatysty 34,7% quraıdy.
Qarjy mınıstri Baqyt Sultanov, óz kezeginde, bıylǵy jylǵa arnalǵan respýblıkalyq bıýdjetti naqtylaý týraly Zań jobasyn tanystyrdy, ol Memleket basshysynyń Qazaqstan halqyna joldaýlarynda jáne Prezıdenttiń 5 áleýmettik bastamasynda bergen tapsyrmalaryn iske asyrýǵa baǵyttalǵan.
2018 jylǵa arnalǵan respýblıkalyq bıýdjettiń bekitilgen kórsetkishterin naqtylaýǵa eldiń ózgertilgen makroekonomıkalyq kórsetkishter boljamy negiz boldy.
Osylaısha, respýblıkalyq bıýdjet túsimderi 181,4 mlrd teńgege ulǵaıtylyp, 8 759,7 mlrd teńgeni qurady. Bul negizinen munaı baǵasy men óndirý kóleminiń ulǵaıýy nátıjesinde munaıǵa eksporttyq kedendik bajdarynan salynǵan túsimder esebinen boldy.
2018 jylǵa arnalǵan respýblıkalyq bıýdjet shyǵystary 417 mlrd teńgege ulǵaıyp, 9 643 mlrd teńgeni quraıdy. Osy qarajat kóleminen 292,5 mlrd teńge Memleket basshysynyń «Qazaqstannyń úshinshi jańǵyrýy: jahandyq básekege qabilettilik» jáne «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» joldaýlaryn iske asyrýǵa baǵyttalatyn bolady.
«Muǵalimderdiń jalaqysyn 30-dan 50%-ke kóterýge 61,8 mlrd teńge bólinedi, bilim berý tapsyrysyn 20 myń grantqa ulǵaıtýǵa 5 mlrd teńge bólý usynylady. Múgedekter kútimimen aınalysatyn adamdarǵa jańa járdemaqy berýge – 2,7 mlrd teńge; aýyldyq eldi mekenderdi aýyz sýmen qamtamasyz etýge qosymsha 30,9 mlrd teńge baǵyttalatyn bolady», — dedi Baqyt Sultanov.
Budan ózge, bıýdjet jobasynda Prezıdenttiń tapsyrmalary men buryn qabyldanǵan mindettemeler boıynsha jalpy somasy 99,4 mlrd teńgeni quraıtyn shyǵystar eskerildi. Baqyt Sultanov atalǵan qarajattar aıasynda Astana (25 mlrd teńge) jáne Almaty (10,7 mlrd teńge) qalalaryn odan ári damytý, áskerı qyzmetshilerdi turǵyn-úımen qamtamasyz etý (18,7 mlrd tenge) boıynsha is-sharalar men jobalar qarjylandyrylatynyn aıtty.
