Sondaı-aq «Qurmanǵazy dombyrasy mýzeı sahnasynda» atty úsh kúndik kórmede Atyraý oblystyq tarıhı-ólketaný mýzeıiniń qorynda saqtaýly turǵan Qurmanǵazynyń dara aýyz myltyǵy, shákirti Dına Nurpeıisovanyń belbeýi jáne Batys Qazaqstan tarıhı-ólketaný mýzeıi qoryndaǵy Dınanyń kamzoly, HIH ǵasyrdaǵy shapany men zergerlik buıymdar jurt nazaryna usynyldy. Kórme sońy kúı jáne dástúrli ánniń keshimen jalǵasyn tapty. Konsertte Qurmanǵazy atyndaǵy Qazaq memlekettik akademııalyq halyq aspaptary orkestriniń dombyrashylary jáne jeke oryndaýda Qajybek Bekbosynov, Batyrjan Myqtybaev, Ásel Alına, Rahat Sársenov, Asylbek Ahatov, Edige Nábıuly óner kórsetti.
Memleket basshysy N.Nazarbaev «Bolashaqqa baǵdar: rýhanı jańǵyrý» baǵdarlamalyq maqalasynda: «Bizdiń ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz – bir sózben aıtqanda, ulttyq rýhymyz, boıymyzda máńgilik qalýy tıis. Abaıdyń danalyǵy, Áýezovtiń ǵulamalyǵy, Jambyldyń jyrlary men Qurmanǵazynyń kúıleri, ǵasyrlar qoınaýynan jetken babalar úni – bular bizdiń rýhanı mádenıetimizdiń bir parasy ǵana», degen edi. Ult pen urpaq keleshegi úshin kóterilgen máselelerdi júzege asyryp, sheshimin tabý maqsatynda Yqylas atyndaǵy halyq mýzykalyq aspaptary mýzeıi belgili adamdardyń aspaptaryn jınaıtyn dástúrin qaıta jańǵyrtyp, qolǵa almaq. Osyǵan baılanysty arada bir ǵasyr ótken soń uly kúıshi Qurmanǵazy dombyrasynyń kóshirmesi men onyń tikeleı shákirti Erǵalı Esjanovtyń dombyrasy mýzeı qoryn tolyqtyryp otyr.
Aıgúl AHANBAIQYZY,
«Egemen Qazaqstan»
ALMATY
