Saltanatty keshte qazylar fınalǵa shyǵatyn 5 arýdy iriktep aldy. Oǵan Dınara Baımuratova (Semeı,17 jasta), Sabına Ázimbaeva (Almaty, 18 jasta), Maımýna Kúlkesheva (Astana, 19 jasta), Álfııa Ersaıyn (Atyraý, 16 jasta), Ekaterına Dvoreskaıa (Karaǵandy, 19 jasta) ilikti. Osydan soń elimizdiń eń sulýyn dástúrli túrde qazaqstandyqtar tikeleı efır arqyly ótkizilgen onlaın jáne SMS daýys berý arqyly tańdady. Onyń qorytyndysy boıynsha, kóp daýys jınaǵan «Qazaqstan arýy-2018» baıqaýynyń jeńimpazy anyqtaldy. Nátıjesinde Atyraý qalasynyń 16 jastaǵy turǵyny Álfııa Ersaıynǵa 4250 adam daýys berip, jeńimpaz atandy.
Budan bólek birinshi vıse-mıss ataǵyna E.Dvoreskaıa laıyq dep tanylsa, ekinshi vıse-mıss bolyp M. Kúlkesheva tanyldy. Al úshinshi vıse-mıss ataǵyn
D. Baımuratova jeńip aldy. Baıqaýda boıjetkenniń qazaq tilin meńgerýi, ádebıet, tarıh, salt-dástúr boıynsha bilimi synǵa túsedi.
«Nátıjesin jarııalaǵan kezde qatty qýandym. Álfııa, rasynda da bul ataqqa laıyq. О́zi 16 jasta, qazaqtyń qarapaıym otbasynda tárbıelengen. Onyń boıynda erekshe daryn bar. Qazaq qyzdarynyń bári Álfııadaı bolsa eken deımin. Naǵyz arý, eń bastysy onyń boıynda halqyna, Otanyna degen súıispenshiligi zor. Eger arýymyzben kógildir ekran arqyly ǵana emes, jaqynyraq, betpe-bet tanyssańyz, onyń júregi mahabbatqa toly ekenin baıqaısyzdar. Biz, qazylar alqasynyń múshesi retinde olardyń árqaısysymen tildestik. Álfııany «Qazaqstan arýy» dep nyq senimmen aıta alamyn», – dedi Prezıdenttiń «Altyn sapa» syılyǵynyń laýreaty, «Qurmet» ordeniniń ıegeri Yrza Tursynzada.
Álfııa Ersaıyn Atyraý gýmanıtarlyq kolledjiniń 2-kýrs stýdenti. Osy jyldyń basynda óz kolledjinde eń ádemi qyz bolyp tanylsa, ótken jyly «Atyraý arýy-2016» baıqaýynyń úzdik ondyǵyna kirgen edi. Qazirgi tańda modeldik bızneste jumys istep jatyr.
Al baıqaý dıreksııasynyń tehnıkalyq bólim mamany bıylǵy halyqtyq daýys berýdiń tehnıkalyq hattamasyn jańartýdaǵy jańa jetistikterin atady.
– Bizdiń bıylǵy basty mindetimiz – baıqaýdyń tikeleı efıri kezinde úzdiksiz daýys berýdi qamtamasyz etý bolatyn. Ol úshin daýys berýdiń alǵashqy kúnderi barynsha júkteme berilip, synaqtan ótkizildi. Nátıjesinde fınal kúni serverge túsirilgen bir mezgildegi júkteme 30 myńnan (2016 jyl) 70 myń (2018 jyl) paıdalanýshyǵa deıin kóbeıip ketti, bul búkil eldiń úzdiksiz halyqtyq daýys berý múmkindigin qamtamasyz etti, – dedi tehnıkalyq bólimniń mamany Raım Dadybaev.
Bir aıta keterligi, ulttyq fınal ádettegideı jańa jyl qarsańynda emes, Naýryz merekesi kúnderinde ótkizildi. 22 naýryzdan bastap «Qazaqstan arýy-2018» resmı saıtynda baıqaý fınalısterine daýys berý bastalǵan edi. «Qazaqstan arýy» baıqaýynyń jeńimpazy aqshalaı júldeden bólek, lıýks brendterimen jarnama boıynsha birqatar kelisimshart jasaıdy jáne tıisinshe «Álem arýy-2018» baıqaýynda Qazaq stannyń namysyn qorǵaıtyn bolady.
Qazaqstan arýy» baıqaýy Qazaqstan Respýblıkasy aýmaǵynda «Dúnıe júzi arýy» (AQSh), «Álem arýy» (Ulybrıtanııa) sııaqty iri álemdik baıqaýlardyń arnaıy lısenzııalarynyń birden-bir ıelenýshisi.
Aıa О́MIRTAI,
«Egemen Qazaqstan»
