Men oqý ornynyń basshysy retinde Prezıdenttiń ıpotekalyq nesıeniń paıyzdyq ósimin tómendetý, alǵashqy jarna kólemin azaıtýǵa baılanysty bastamalaryn erekshe atap ótkim keledi. Bizdegi kóptegen jas muǵalimder, óndiristik oqytý sheberleri alǵashqy kezderi azǵantaı eńbekaqymen otbasyn asyrap, jataqhana nemese jaldamaly páterlerdi jaǵalap júretini shymbaıyma batatyn.
Prezıdent respýblıkalyq ortasha jalaqydan tómen eńbekaqy alatyn tehnıkalyq qyzmetkerlerimiz, laboranttarymyz, tipti qaraýyldarymyzǵa deıingi sanattaǵy toptyń da múddesine saı keletin bastamalardy kóterdi. Eger tabys salyǵy tómendetilse, olardyń jalaqylary joǵarylap, tabysy sál de bolsa kóbeıer edi.
Meni Elbasynyń joǵary bilim alýǵa bólinetin granttar sany kóbeıtilip, sapasyna mán beriletini turǵysyndaǵy bastamasy shyn qýantty. Bul bastama alǵyr, úzdik oqýshylardyń syrtqa ketýine toqtaý bolary sózsiz. Prezıdenttiń tórtinshi bastamasy da bilim salasyna tikeleı baılanysty. Qolyna dıplomyn alǵan túlegimiz shaǵyn nesıe de alyp óz kásibin bastap jatsa, armandarynyń oryndalýyna bir taban jaqyndaı túser edi.
Depýtat retinde elimizdi gazdandyrýdyń keshendi baǵdarlamasyn da qos qoldap qoldaımyn. Ásirese aýyl jastary týǵan jerinde tútin tútetip, alysqa arman qýyp ketpeýshi edi.
Saıyp kelgende, áleýmettik memleketti qalyptastyrý eldiń yntymaǵyna, turaqtylyǵy men Qazaqstannyń tutastaı damýyna oń yqpal eterine senemin.
Marat JURQABAEV,
Qostanaı qalalyq máslıhatynyń depýtaty
