– Dáýren, bıylǵy qurlyq birinshiliginen qandaı áser alyp qaıttyńyz?
– Chempıonat óte qyzyqty ári tartysty ótti. Birinshilik barysynda qanshama emosııaǵa toly oıyndar boldy. Bizdiń qurama 2016 jyly Serbııada ótken chempıonatpen salystyrǵanda joǵary deńgeıde oınady. О́kinishke qaraı bul joly júlde buıyrmady. Eýropa quramalary bir-birine shamalas, ońaı oıyn bolǵan joq.
– Uzaq ýaqyt jaraqattan kóz ashpadyńyz? Qazir jaǵdaıyńyz qalaı?
– Bıyl bulshyq etten eki ret jaraqat aldym. Sońǵysy óte qıynǵa soqty, eki jarym aı dop tepken joqpyn. Baqytyma oraı Eýropa chempıonatyna deıin qalypqa kelip úlgerdim. Qazir bári jaqsy.
– Endi ótkenge sheginis jasap kórsek, fýtbolshy bolýyńyzǵa ne sebep?
– Meni úlken aǵam jeti jasymda fýtbolǵa alyp keldi. Tımýr mektepte fýtbol seksııasyna qatysatyn, al men onyń sońynan ańdyp, istegenin qaıtalap júretinmin. Sóıtip dop tebýdi birte-birte bastap kettim. Aldymen mekteptiń komandasynda, sosyn «Shahterde» oınadym. 14-ten 25 jasyma deıin «Tulpar» sapynda oınadym. Bizdiń býynnyń joly boldy dep aıta alamyn, óıtkeni Ámirjan Muqanov jáne Vladımır Kravchenko sekildi bapkerlerden tálim aldyq.
– Qaraǵandynyń 1987-1990 jyldary týǵan fýtzalshylary osydan 10 jyl buryn jarqyrap shyqty, ulttyq quramanyń negizin qalady. Biraq keıingi jastardan quramaǵa shaqyrylyp júrgenderi joqtyń qasy. Munyń sebebi nede?
– 2005 jyly «Tulpar» komandasy quryldy. Al biz 1987-1990 jylǵy jigitter «Tulpar-2» komandasynda oblys chempıonatynda oınap júrdik. Ámirjan Muqanov pen Vladımır Kravchenko bastaǵan bapkerler shtaby bizdi negizgi quramǵa tartty. Arada 1,5 jyl ótkende Qazaqstan chempıonatyna qatystyq. Bapkerimiz senim artty, qatelikterden sabaq alýdy úırendik. Alańda kóp oınaýymyzǵa múmkindik aldyq. Onyń ústine básekelestik óte joǵary boldy. Sonyń bári óz jemisin berdi. Qazir jastarda ondaı oıyn tájirıbesi joq. Eń ókinshtisi «Tulpardyń» baıaǵy mektebi qalmady.
– Aǵańyz Tımýrdyń «Tulpar» sapynda oınaǵanyn, bir kezderi ulttyq quramaǵa shaqyrylǵanyn bilemiz. Biraq sońǵy kezderi nege kórinbeı ketti?
– «Tulpar» sapynda «stolba» bolyp oınaıtyn. О́zi solaqaı. Keıinnen kóp ýaqytyn oqýǵa bólip, fýtzaldan alystap ketti. Qazir oblys birinshiliginde ózi úshin ǵana oınaıdy.
– Bos ýaqytyńyzda nemen aınalysasyz?
– Shynyn aıtý kerek, mende bos ýaqyt asa kóp emes. Bola qalǵan jaǵdaıda úıde bolamyn, arasynda monshaǵa baramyn. Almatyda ózim jalǵyz turǵandyqtan keshke Shyńǵys Esenamanovtyń úıine qonaqqa baryp, onyń balalarymen oınaımyn.
– Sheteldiń qaı komandasy unaıdy?
– О́zge eldiń quramasyna eshqashan jankúıer bolǵan emespin. Al klýbtardan Ispanııanyń «Atletıko» klýbyna búıregim burady. О́ıtkeni maǵan juldyzdardy jınap alatyn komandalar eshqashan unaǵan emes. Al «Atletıkonyń» ózindik oıyn órnegi jáne komandalyq rýhy bar. Sondyqtan janyma jaqyn komanda.
– Álemdik fýtbol juldyzdary gol soqqanda árqaısysy ózderinshe toılap jatady. Sizdiń sondaı erekshe stılińiz bar ma?
– Mende ondaı erekshe «fıshka» joq. Gol soqqanda qýanǵanymdy qalaı bildiremin dep oılap kórmeppim. Bastysy, komandama paıdam tıse boldy, gol soǵý jeke maqsatym bolǵan emes. Kolýmbııada ótken álem chempıonatynda Ispanııa qaqpasyna soqqan golym esimde.
– Jeıdedegi nómirińizge qatty mán beresiz be?
– Buryn únemi «5» nómirmen oınaıtynmyn. Biraq «Qaıratta» bul nómir bos emes. Ýaqyt kele qandaı nómirmen oınasa da báribir ekenin túsindim. Tek «6» jáne «13» degen sandar unamaıdy, basqa kez kelgenin alýǵa daıynmyn.
Bek TО́LEÝ,
jýrnalıst
