Qa­zaq ulttyq konservatorııasynda halyqaralyq zamanaýı mýzyka festıvali ótti

Almatyǵa eýropalyq tyńdarmandar arasynda aty keńinen tanymal Salvatore Sharrıno jáne Tosıo Hosokava, belgili qazaqstandyq kompozıtor Aqtoty Raıymqulova jáne Sanjar Báıterekovter meıman retinde shaqyrylǵan festıvaldiń dárejesi eń ozyq, sony baǵyttaǵy mýzykanyń oryndalýymen aıqyndaldy. Konservatorııanyń zaldary men oqý aýdıtorııalarynda qazirgi zamannyń jetekshi mýzykanttary, mýzykatanýshylar men án-kúı bilgirleri XXI ǵasyrdaǵy mý­zyka tilinde pikirtalas júr­gizip, mýzyka áleminiń eń bas­ty málimetterimen, jańal­yq­tarymen tanystyryp, onyń eń ózekti baǵyttaryn aıqyndap kórsetý úshin jınaldy. Jalpy maqsaty – jańa akademııalyq mýzykany damytý, shyǵarmashylyq baılanysty jandandyrý, ónerdi oı men ómirdiń quraly retinde jetildire túsý, qazirgi zamanǵy mýzykalyq shyǵarmalardy nasıhattaıtyn bastamalarǵa qatysý.

 Festıvaldiń konserttik baǵdarlamasy keń aýqymda jos­parlandy. Onyń aıasynda 12 qazaqstandyq jáne 4 shet­eldik premera, sondaı-aq dá­rister, tusaýkeserler, sha­qy­rylǵan qonaqtar men qa­zaq­standyq mýzykanttardyń sheberlik saǵattary ótkizildi. Máselen, Trıstan Mıýraı óz dári­sinde «Dybystan mýzykalyq kompozısııaǵa» qalaı ótý ke­rek­tigin aıtsa, Klaýs Leng tyń­daýshylaryna «Mahabbat jáne nota» taqyrybyn usyndy.

Zamanaýı mýzyka baǵyt­ta­ryn qadaǵalap, bul ónerdi ja­ńasha je­tildirý jolynda iz­denip júrgen aty álemge áıgili kom­pozıtorlar Trıstan Mıýraı (Fransııa) jáne Klaýs Lang (Avstrııa), fleıtashy Marıo Karolı (Italııa), skrıpkashy Vladıslav Pesın (Reseı), «Nikel» (Izraıl), dırıjer Fedor Lednev (Reseı), «Igerý» (Qazaqstan) jáne Qazaqstan Res­pýblıkasynyń Memlekettik akademııalyq sım­fonııalyq orkestri tórt kún boıy qaty­sýshy­lar­dyń qabiletin saralap, kó­rermender aldynda ózderi de óner kórsetti.

Zamanaýı mýzyka festıvali Al­matyda ǵana ótkiziledi. Fes­tı­valdiń naqty nátıjesi retinde ózderin tanytýdyń biregeı jolyn izdeýden jalyqpaıtyn mýzykanttar sanynyń artýyn, qazirgi zaman mýzykasy oryndalatyn konsertterden jańa ıdeıalar tapqysy keletin tyńdaýshylar qatarynyń tolyǵa túskenin ataýǵa bolady. Endigi jerde zamanaýı mýzyka festıvalin ulttyq deńgeıdegi mádenı is-sharaǵa aınaldyrý kózdelip otyr.

Aıgúl Ahanbaıqyzy, 

«Egemen Qazaqstan»

Almaty