Shynynda da, ilýde bir bolmasa, aýylda taba nandy ystyqtaı jemeıtinimiz ras qoı. Ystyq nandy bir týrasań, sol boıynda túgeldeı jelinýi kerek, áıtpese shıki bolyp qalady deıtin. Áıteýir qaz-qatar pisirip qoıǵan taba nannyń buryn piskenin týrap, jańa piskenin qaldyra beretin ádet áli de bar. Bul buryn pisken nan qatyp qalmasyn, ysyrap bolmasyn degennen týǵan nıet shyǵar múmkin.
Osydan otyz jyl buryn Almatyǵa barǵanda basymnan ótken bir qyzyq oqıǵa esimnen ketpeıdi. Aýyldan alyp qalaǵa alǵash aıaq basýym. Almatynyń naq ortalyǵynda, Pýshkın kóshesinde turatyn ákemniń nemere aǵaıyny Ǵaınesh aǵanyń páterine tústik. Úıdiń otanasy Sofııa jeńgeı jaryqtyq, sóılep turǵan, óktemdeý, kisi jumsaǵysh jan eken. Meni birden dúkenge nanǵa jumsady. Lenın dańǵylyn kesip ótip, «Rossııa» dúkenine baratyn jolymdy táptishtep túsindirdi.
Árıne aıtylǵan jerge baryp, sórede qaz-qatar tizilip turǵan nannyń ishinen ábden keýip, qabyǵy qatqan nandy terip ákeldim ǵoı. «Apyrmaı, myna bólkeler endi bolmaǵanda múldem jemesteı bolyp qatyp qalady eken. Obal-aı» dep qoıamyn ishimnen.
...Obal-saýapty oılaǵan balań áreketimniń sońy qalaı aıaqtalǵanyn oqyrman ózi uǵyp otyrǵan shyǵar. Men ákelgen nandy kórip, Sofııa jeńgeı shoshyp ketti. «Budan basqa nan joq pa eken?!» degen tańdanysqa toly suraǵyna dúkende nannyń tolyp turǵany týraly jaýap alǵan soń biraz burqyldady dersiń. «Aýyldan shyqpaǵan ańqaý», «Tipti nan tańdaý bilmeıtin nadan» balany syrtynan biraz sybaǵan sııaqty...
Búginde ózimiz de ábden qalalyq bolyp aldyq qoı. Sýpermarketke kirsek, nannyń ystyǵyn alǵymyz kelip turady. О́mir-aı deseńshi.
Osy, dúkenderde qatqan nandy qaıda jiberedi eken, á?!
Qazbek QUTTYMURATULY,
«Egemen Qazaqstan»
ORAL
